Ammanettiyo Uri Neeyyo Worddoti Erii?
Ammanettiyo Uri Neeyyo Worddoti Erii?
AMMANETTIYO uri neeyyo worddotidoogaa eriyoogaappe aaruwan qohiyaabi guutta. Ne yiillotana danddayaasa woy he uri nena kawushshidabadan woy ubba kaddidabadan neeyyo siyettana danddayees. Worddotiyoogee laggetettaa moorees, aqo deˈuwaa laalees, qassi asay cimettidi daro miilooniyan qoodettiya biraa kasaaranaadan oottees.
Ammanettiyo uri Xoossaabaa neeyyo worddotidoogaa erikko, neeyyo aybi siyettanaakko qoppa. Neeni haymaanootiyaa mintta kaalliya ura gidikko, he worddoy woosa keetti biya, kaallidi deˈiya asatuugaadan ne bolli wolqqaama qohuwaa gattana danddayees:
● “Woossa keettay tana kaddidabadan tau siyettiis.”—DIN.
● “Taani yiillotaas. Taani cimettidabadan, giishin ta hidootaynne halchoy mela attidabadan qoppaas.”—LUWIS.
Issi uri Xoossaabaa neeyyo wordduwaa yootiis gaada qoppanaukka metootana danddayaasa. Ne siyidobaa neeyyo yootiday ne ammanettiyoonne nena qohanau koyenna ura, giishin nena yelida ura, qeese, wonggelaawe woy ne mata lagge gidana danddayees. Issibay neeni ne deˈo laytta ubban ammanidobaa gidana danddayees. SHin cora asay ammaniyoobaykka worddo gidana danddayiyoogaa maayikkii? Beni Amarkka biittaa Pirezddanttee Franklin D. Ruzevelti hegee tuma gidiyoogaa akeekiis. Ayssi giikko i, “Worddo gididabaa zaaretti zaarettidi yootiyoogee hegaa tuma kessenna” yaagiis.
Ammanettiyo uri neeyyo worddotidaakkonne waatada erana danddayay? Yesuusi issi wode Xoossaakko woossiiddi, “Ne qaalaikka tumatettaa” yaagiis. (Yoh. 17:17) Ee, Xoossaa Qaalaa, Geeshsha Maxaafay nuuni tumaa wordduwaappe shaakki eranau koshshiyaabaa oyqqiis.
Xoossaabaa wordduwaa yootiyo, meeze gidida ichashubata Geeshsha Maxaafay qoncciyaa kessiyoogaa ayssi beˈikkii? Tumay ne deˈuwaa waati laammana danddayiyaakko neeni akeekana.
