Kaan Bannagem, Fa?

GA RA nang ni ke bannagem be’ ma rib gel e kireban’ ni ga ra tay. Sana ga ra tamra’, ara mu damumuw, ara mu lemnag ni ke bannagem be’ nib t’uf rom ara be’ ni be pagan’um ngak. Ban e aram ban’en ni ma kirebnag thilin e fager nge mabgol. Ma boor e girdi’ ni ke mul u pa’ bokum milyon e salpiy ni bochan e re n’ey.

Ra uw rogon u wan’um ni faan ga ra nang ni kan bannagem u murung’agen Got? Faanra gur be’ nri gab m’ing ko teliw rom, ma rib gel e kireban’ ni ga ra tay ni bod e gali cha’ ni baaray ni lungurow:

● “Kug nang ni ke bannageg e teliw rog.”​—DEANNE.

● “Kar gu damumuw. Kug nang ni kan bannageg, ma pi n’en ni ug athapeg nge pi n’en ni ug nameg e ke yan i aw nib m’ay fan.”​—LUIS.

Sana ba mo’maw’ ni nge mich u wan’um ni kan bannagem u murung’agen Got, ya n’en ni ga manang e sana be’ nib pagan’um ngak ara be’ ndamur lemnag nra bannagem e ir e ke yog ngom, ni bod rogon e gallabthir rom, ara reb e padre, ara reb e pastor, ara be’ nrib fel’ e thin romew. Sana bay reb e machib ni ke n’uw nap’an ni ke mich u wan’um. Machane gathi ra riyul’ u wan’um ni bay boch ban’en ni ke mich u wan’ boor e girdi’ ma bin riyul’ riy e goo ban? Immoy reb e Pilung u Meriken ni Franklin D. Roosevelt fithingan ni nang ni riyul’ e re n’ey, ya yog ni gaar: “Demtrug urngin yay ni yira sul u daken ban’en ni goo ban ma dabi riyul’.”

Ere uw rogon ma ga nang ko kan bannagem fa danga’? Immoy bayay ni meybil Jesus ngak Got ni gaar: “Mu fil ngorad e tin nib riyul’, ni er e thin rom.” (John 17:17) Arrogon, Thin rok Got ni Bible e ra ayuwegdad ni ngad nanged e n’en nib thil u thilin e tin riyul’ nge tin nde riyul’.

Ere mang ndab mu pag nge tamilangnag e Bible lal e ban u murung’agen Got? Ya rayog ni ngam guy rogon nra thilyeg e tin riyul’ e yafas rom nge fel’.