1 Lok i kom Lubanga Pe Niange Tika Man Tye Lok Ada?
1 Lok i kom Lubanga Pe Niange Tika Man Tye Lok Ada?
Gin ma gwok nyo iwinyo: “Lubanga timo jamine i yo ma niang iye tek.”
“Dano pe gitwero niang i kom Won, Wod, ki Cwiny Maleng.”—lok ma kikwanyo ki i Athanasian Creed, ma lubbe ki kit ma kanica mapol pa Lukricitayo ata-ni gipwonyo kwede lok kom Triniti.
Gin ma Baibul pwonyo: Yecu owacci jo ma ‘gitye ka nongo ngec i kom . . . Lubanga acel me ada’ gibinongo mot mapol. (Jon 17:3) Ento watwero nongo ngec i kom Lubanga nining ka lok kome pe niange? Jehovah pe kanne ki botwa, ento en mito ni dano ducu gunge en.—Jeremia 31:34.
Ki lok ada, pe waromo ngeyo lok ducu madok i kom Lubanga. Lok man pe miyo wabedo ki ur pien tamme ki yone tye malo kato mewa woko.—Latitlok 3:11; Icaya 55:8, 9.
Kit ma ngeyo lok me ada konyi kwede: Ka dano pe gitwero niang lok madok i kom Lubanga, ci dong konye pe me bedo ka yelle me ngeyo en. Ma ka meno, en konyowa pe me niang lok kome keken ento me bedo ki wat macok kwede. Lubanga olwongo Abraim, laco ma obedo lagen ni ‘lareme,’ ki dong Kabaka Daudi me Icrael ocoyo ni: “Rwot bedo larem jo ma gilwore.”—Icaya 41:8; Jabuli 25:14.
Tika tam moni ni bedo ki wat macok ki Lubanga-ni tye gin ma tek tutwal? Twero nen calo gin ma tek tutwal pi tyen mukwongo, ento kwan kong gin ma Tic pa Lukwena 17:27 waco: “ En pe tye cen ka mabor ki bot ngat acel acel i kinwa.” I yo ango? Kun tiyo ki Baibul, Lubanga omiyo botwa gin ma wamito wek wange en maber. *
En otito botwa ni nyinge Jehovah. (Nia 3:15) En otito botwa i Baibul jami mapol ma etimo piwa wek wange Lubanga ma en ebedo. Makato meno, Lubanga titiwa kit ma ewinyo kwede ki i cwinye. En “lakica dok maro dano, kiniga pe make oyot, marre ma pe lokke dwong, en lagen mada.” (Nia 34:6) Jami ma watimo gudo kit ma en winyo kwede. Me laporre, rok me Icrael me kare macon “gucwero cwinye” i kare ma gujemo i kome, ento jo ma gubedo luwiny bote gumiyo cwinye obedo yom.—Jabuli 78:40; Carolok 27:11.
[Lok ma tye piny]
^ para. 7 Pi ngec mukene ma lubbe ki gin ma Baibul waco i kom Lubanga, nen dul me 1 i buk me Baibul Mono Ada Pwonyo Gin Ango? ma Lucaden pa Jehovah aye gucoyo.
[Boro bok i pot karatac 4]
Ka Lubanga tye Triniti ma pe watwero niang i kome, ci wan watwero ngeyo en nining?
[Ka ma cal oa ki iye i pot karatac 4]
The Trinity c.1500, Flemish School, (16th century)/H. Shickman Gallery, New York, USA/ The Bridgeman Art Library International
