1 Ang Diyos Usa ka Misteryo—Tinuod ba Kana?
1 Ang Diyos Usa ka Misteryo—Tinuod ba Kana?
Ang imo tingaling nadunggan: “Misteryoso ang mga paagi sa Diyos.”
“Ang Amahan Dili Matugkad, ang Anak Dili Matugkad, ug ang Espiritu Santo Dili Matugkad.”—Ang Athanasian Creed, nga naghubit sa Trinidad nga gitudlo sa daghang relihiyon sa Kakristiyanohan.
Ang gitudlo sa Bibliya: Si Jesus miingon nga kadtong ‘mokuhag kahibalo bahin sa bugtong matuod nga Diyos’ makadawat ug mga panalangin. (Juan 17:3) Apan unsaon nato pagkuhag kahibalo sa Diyos kon siya usa ka misteryo? Inay itago ang iyang kaugalingon, buot niyang ang tanan makaila kaniya.—Jeremias 31:34.
Siyempre, dili gyod nato mahibaloan ang tanan bahin sa Diyos. Tungod kini kay ang iyang mga hunahuna ug dalan mas taas kay sa atoa.—Ecclesiastes 3:11; Isaias 55:8, 9.
Kon sa unsang paagi ang pagkahibalo sa kamatuoran makatabang nimo: Kon ang Diyos maoy dili matugkad nga misteryo, nganong mokuha pa man tag kahibalo bahin kaniya? Hinunoa, siya dili lang kay nagtugot nato nga matugkad siya kondili nagtugot usab kanato nga masuod kaniya. Gihubit sa Diyos ang matinumanong tawo nga si Abraham ingong “akong higala,” ug si Haring David sa Israel misulat: “Ang pagkasuod kang Jehova ila sa mga nahadlok kaniya.”—Isaias 41:8; Salmo 25:14.
Imposible bang masuod sa Diyos? Tingali oo, apan matikdi ang giingon sa Buhat 17:27: “[Ang Diyos] dili halayo gikan sa matag usa kanato.” Sa unsang paagi? Pinaagi sa Bibliya, gitabangan ta sa Diyos nga makaila pag-ayo kaniya. *
Iyang gipaila kanato ang iyang ngalan, si Jehova. (Isaias 42:8) Iyang gipasulat ang iyang mga pakiglabot sa tawo aron mailhan nato kon unsa siya nga Persona. Labaw pa niana, iyang gibutyag kanato ang iyang pagbati. Siya “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.” (Exodo 34:6) Ang atong binuhatan makaapektar sa iyang pagbati. Pananglitan, ang karaang nasod sa Israel ‘nakapasakit’ kaniya sa dihang sila mirebelde, samtang kadtong misunod kaniya nakapalipay kaniya.—Salmo 78:40; Proverbio 27:11.
[Footnote]
^ par. 7 Alang sa dugang impormasyon kon unsay gisulti sa Bibliya bahin sa Diyos, tan-awa ang kapitulo 1 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
[Blurb sa panid 4]
Kon ang Diyos usa ka misteryosong Trinidad, unsaon man nato pagkaila kaniya?
[Picture Credit Line sa panid 4]
The Trinity c.1500, Flemish School, (16th century)/H. Shickman Gallery, New York, USA / The Bridgeman Art Library International
