1 Mi Monomonolo Pworausen Kot—Itä Mi Pwüng Ena?
1 Mi Monomonolo Pworausen Kot—Itä Mi Pwüng Ena?
Eli, iei met ka fen rongorong: “Sise tongeni weweiti än Kot kewe angang.”
Neman ka fen käeö pwe än Kot kewe angang mi fokkun tekia me ra monomonolo ina minne kosap tongeni sileöchü i. Eli ekkoch ra äwewe ngonuk pwe a wor ülümön Kot lon emön me apasa pwe a monomonolo pworausan.
Ifa äitien ewe Paipel: Jises a apasa pwe iir kewe mi “silei . . . ewe eman chök Kot mi let” repwe küna feiöch. (Jon 17:3) Iwe, ifa usun sipwe tongeni silei Kot ika pwe mi monomonolo pworausan? Kot ese tükümaalo pworausan, a mochen pwe aramas meinisin repwe sile i.—Jeremaia 31:34.
Pwüngün, sise tongeni silei meinisin pworausen Kot. Pokiten an ekiek me an föfför ra fokkun tekia seni ach.—Än Salomon Afalafal 3:11; Aisea 55:8, 9.
Om silei ewe enlet epwe älisuk: Ika pwe a monomonolo pworausen Kot, iwe, met popun sipwe pwal mochen silei i? Iwe nge, Kot a atufichikich ach sipwe weweiti pworausan me a pwal mochen ach sipwe pacheöch ngeni. A eita ngeni ewe mwän mi tüppwöl Eperiam “chiechiei,” me iei met Tafit, ewe kingen Israel a makkeei: “Ewe Samol mi Lapalap a chiechifengen me chokewe mi niuokusiti i.”—Aisea 41:8; Kölfel 25:14.
Iwe met, sia ekieki pwe sise tongeni chiechiöch ngeni Kot? Neman a ina usun meefiach, iwe nge nengeni met Fofor 17:27 a apasa: “Kot esap wesewesen toau seni eman me eman leich.” Ifa usun? Kot a awora me ren ewe Paipel, minne sia osupwangan pwe sipwe sileöchü i. *
Kot a äiti ngenikich itan we, Jiowa, are me ren eü afföün Paipel a nöünöü Yahweh. (Ekistos 6:3, Ewe Kapasen God) A fen äiti ngenikich me lon Paipel ifa usun föfförün ngeni aramas pwe sipwe tongeni silei ika I met sokkun Kot. Nge lap seni ena, a pwal pwäraalo meefian ngenikich. I emön ‘Kot mi eäni ümöümöch me kirikiröch, songomang, pwal wöün tong me allükülük.’ (Ekistos 34:6) Föfförüch a tongeni kküü meefian. Äwewe chök, ewe mwuun Israel loom a “achouu” letipan lupwen ra ü ngeni, nge ekkewe mi älleasochisi ra apwapwaai letipan.—Kölfel 78:40; Än Salomon Fos 27:11.
[Pwóróus fan]
^ par. 7 Ren pwal ekkoch pworaus usun met ewe Paipel a apasa usun Kot, ppii ewe puk, Met ewe Paipel A Wesewesen Apasa? sopwun 1, förien Chon Pwäratä Jiowa.
[Ekis Pwóróus lón pekin taropwe 4]
Ika pwe ülümön Kot lon emön, iwe, ifa usun sipwe tongeni wesewesen silei I?
[Credit Line lon pekin taropwe 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International
