1 Ang Dios Misteryo Matuod—Bala Ini?
1 Ang Dios Misteryo Matuod—Bala Ini?
Ang mahimo nabatian mo: “Ang Dios nagapanghikot sing misteryoso.”
“Ang Amay indi matungkad, ang Anak indi matungkad, kag ang Espiritu Santo indi matungkad.”—Ang paglaragway sang Athanasian Creed sa Trinidad nga ginatudlo sang madamo nga simbahan nga nagapangangkon nga Cristiano.
Ang ginatudlo sang Biblia: Si Jesus nagsiling nga ang mga ‘nagakuha sing ihibalo parte sa lamang matuod nga Dios’ makabaton sing mga pagpakamaayo. (Juan 17:3) Pero paano kita makakuha sing ihibalo parte sa Dios kon sia misteryo? Wala ginatago sang Dios ang iya kaugalingon, sa baylo gusto niya nga makilala sia sang tanan.—Jeremias 31:34.
Siempre, indi naton mahibaluan ang tanan parte sa Dios. Ang iya mga panghunahuna kag dalanon mas mataas sangsa aton.—Manugwali 3:11; Isaias 55:8, 9.
Kon paano makabulig sa imo ang paghibalo sang kamatuoran: Kon ang Dios misteryo, ano pa ang pulos nga kilalahon sia? Pero, ginhatagan niya kita sing kahigayunan nga makilala sia kag mangin suod sa iya. Gintawag sang Dios ang matutom nga tawo nga si Abraham subong “akon abyan.” Si Hari David sang Israel nagsulat: “Ang pagpakig-abyan sang GINOO yara sa ila nga nagakahadluk sa iya.”—Isaias 41:8; Salmo 25:14.
Daw imposible ang ideya nga mangin suod sa Dios. Pero, talupangda nga ang Binuhatan 17:27 nagasiling nga ‘ang Dios indi malayo sa tagsa sa aton.’ Paano? Paagi sa Biblia, ginabuligan kita sang Dios nga makilala sia sing maayo. *
Ginasugid niya sa aton nga ang iya ngalan Jehova. (Exodo 6:3 *) Ginpasulat niya ang iya pagpakig-angot sa mga tawo para mahibaluan naton kon ano sia nga sahi sang Persona. Labaw sa tanan, ginapahibalo sang Dios ang iya balatyagon. Sia “maloloy-on kag mainayohon, makuli sa pagpangakig, kag bugana sa malig-on nga paghigugma kag sa pagkatutum.” (Exodo 34:6) Ang aton ginahimo makaapektar sa iya. Halimbawa, ‘nagkalisud’ sia sang nagrebelde sa iya ang pungsod sang Israel sang una, pero ang mga matinumanon nagpahalipay sa iya.—Salmo 78:40; Hulubaton 27:11.
[Mga Nota]
^ par. 7 Para sa dugang nga impormasyon sa ginasiling sang Biblia parte sa Dios, basaha ang kapitulo 1 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.
^ par. 8 Sa Maayong Balita nga Biblia, ang footnote sang Exodo 6:3 nagasiling: “Ang Ginoo sa Hebreo nga teksto Yahweh. Sa iban nga pagbadbad ginagamit ang Jehova.
[Blurb sa pahina 4]
Kon ang Dios misteryoso nga Trinidad, paano naton sia makilala?
[Picture Credit Line sa pahina 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International
