១ ព្រះគឺអាថ៌កំបាំង តើពិតឬទេ?
១ ព្រះគឺអាថ៌កំបាំង តើពិតឬទេ?
អ្វីដែលលោកអ្នកប្រហែលជាធ្លាប់ឮ: «កិច្ចការរបស់ព្រះគឺអាថ៌កំបាំង»។
សាសនាជាច្រើនក្នុងពិភពគ្រិស្តសាសនាបានជឿថា ព្រះគឺជាបុគ្គលបីអង្គរួមគ្នាជាព្រះតែមួយ ហើយបានពណ៌នាអំពីសេចក្ដីបង្រៀននោះថា៖ «បិតា បុត្រ និងវិញ្ញាណបរិសុទ្ធជាអ្វីដែលមិនអាចយល់បាន» (The Athanasian Creed)។
អ្វីដែលគម្ពីរបង្រៀន: លោកយេស៊ូបានមានប្រសាសន៍អំពីពួកអ្នកដែល«ស្គាល់ . . . ព្រះពិតតែមួយឲ្យបានច្បាស់»ថានឹងទទួលពរពីព្រះ។ (យ៉ូហាន ១៧:៣) ប៉ុន្តែ បើព្រះជាអ្វីដែលអាថ៌កំបាំង តើយើងអាចស្គាល់លោកឲ្យបានច្បាស់យ៉ាងដូចម្ដេចបាន? ជាជាងលាក់បាំងខ្លួន លោកចង់ឲ្យមនុស្សគ្រប់គ្នាស្គាល់លោកវិញ។—យេរេមា ៣១:៣៤
ពិតមែន យើងមិនអាចស្គាល់អ្វីៗទាំងអស់អំពីព្រះនោះទេ។ នេះជាអ្វីដែលសមហេតុសមផលមែន ព្រោះគំនិតនិងផ្លូវរបស់លោកខ្ពស់ជាង គំនិតនិងផ្លូវរបស់យើងឆ្ងាយណាស់។—សាស្ដា ៣:១១; អេសាយ ៥៥:៨, ៩
ការស្គាល់សេចក្ដីពិតជួយលោកអ្នក: បើព្រះគឺអាថ៌កំបាំងដែលមិនអាចយល់បាន ចាំបាច់ឲ្យយើងត្រូវខំស្គាល់លោកធ្វើអ្វី? ប៉ុន្តែ លោកមិនគ្រាន់តែចង់ឲ្យយើងស្គាល់លោកឲ្យបានច្បាស់ប៉ុណ្ណោះទេ លោកក៏ចង់ឲ្យយើងបណ្ដុះឲ្យមានចំណងមិត្តភាពជាមួយលោកដែរ។ ព្រះបានហៅអាប្រាហាំដែលជាបុរសដ៏ស្មោះត្រង់ម្នាក់ថា«សំឡាញ់»របស់លោក ហើយដាវីឌដែលជាស្តេចនៃស្រុកអ៊ីស្រាអែលបានសរសេរថា៖ «សេចក្ដីមេត្រីមិត្ររបស់ព្រះយេហូវ៉ានៅជាមួយនឹងអ្នកណាដែលកោតខ្លាចដល់ទ្រង់»។—អេសាយ ៤១:៨; ទំនុកតម្កើង ២៥:១៤
តើគំនិតដែលថាឲ្យយើងមានចំណងមិត្តភាពជិតស្និទ្ធជាមួយព្រះជាអ្វីដែលមិនអាចកើតឡើងបានឬ? មនុស្សខ្លះបានគិតដូច្នេះមែន ប៉ុន្តែសូមកត់សម្គាល់ពាក្យនៅក្នុងសកម្មភាព ១៧:២៧ដែលថា៖ «[ព្រះ]មិននៅឆ្ងាយពីយើងម្នាក់ៗ»ឡើយ។ តើព្រះមិននៅឆ្ងាយពីយើងក្នុងន័យអ្វី? គឺព្រះបានផ្ដល់ឲ្យនូវអ្វីដែលយើងត្រូវការដើម្បីស្គាល់លោកឲ្យបានច្បាស់តាមរយៈគម្ពីរ។ *
ព្រះបានប្រាប់យើងថាឈ្មោះរបស់លោកគឺយេហូវ៉ា។ (អេសាយ ៤២:៨) លោកក៏បានឲ្យគេកត់សរសេរអំពីការប្រព្រឹត្តរបស់លោកចំពោះមនុស្សជាតិដើម្បីឲ្យយើងអាចស្គាល់ថាលោកជាព្រះបែបណាដែរ។ បន្ថែមទៅទៀត ព្រះបានបង្ហាញអំពីអារម្មណ៍របស់លោកចំពោះយើង។ ព្រះយេហូវ៉ាជាព្រះដែលមាន«ព្រះហឫទ័យមេត្ដាករុណា ហើយទន់សន្ដោស ទ្រង់យឺតនឹងខ្ញាល់ ហើយមានសេចក្ដីសប្បុរស នឹងសេចក្ដីទៀងត្រង់ជាបរិបូរ»។ (និក្ខមនំ ៣៤:៦) ការប្រព្រឹត្តរបស់យើងអាចជះឥទ្ធិពលទៅលើអារម្មណ៍របស់ព្រះ។ ជាឧទាហរណ៍ ប្រជាជាតិអ៊ីស្រាអែលពីសម័យបុរាណបានធ្វើឲ្យលោក«ព្រួយព្រះហឫទ័យ» ពេលដែលពួកគេបះបោរប្រឆាំងនឹងលោក ប៉ុន្តែពេលដែលពួកគេស្ដាប់បង្គាប់លោក នេះបានធ្វើឲ្យលោកមានអំណរ។—ទំនុកតម្កើង ៧៨:៤០; សុភាសិត ២៧:១១
[កំណត់សម្គាល់]
^ វគ្គ 7 ដើម្បីទទួលព័ត៌មានបន្ថែមអំពីអ្វីដែលគម្ពីរចែងអំពីព្រះ សូមមើលជំពូកទី១ក្នុងសៀវភៅតើព្រះគម្ពីរពិតជាបង្រៀនយ៉ាងណា? ដែលបានបោះពុម្ពផ្សាយដោយសាក្សីព្រះយេហូវ៉ា។
[ឃ្លាអក្សរធំនៅទំព័រ៤]
បើព្រះគឺអាថ៌កំបាំង និងជាបុគ្គលបីអង្គ រួមគ្នាជាព្រះតែមួយ តើយើងអាចស្គាល់ លោកឲ្យបានច្បាស់ យ៉ាងដូចម្ដេចបាន?
[អ្នកផ្ដល់សិទ្ធិឲ្យប្រើរូបភាពនៅទំព័រ៤]
The Trinity c.1500, Flemish School, (16th century)/ H. Shickman Gallery, New York, USA/The Bridgeman Art Library International
