1 Leza I Kikata Kifyame Lelo I bya Bine?
1 Leza I Kikata Kifyame Lelo I bya Bine?
Byokodi padi mwivwane: “Leza uloñanga bintu mu muswelo wampikwa kuyukana.”
“Tata kayukibwa, Mwana kayukibwa, ne Muya Ujila mwine kayukibwa.”—Lufundijo lwa Athanase, lushintulula Busatu Busantu bufundijibwe bipwilo bivule bya Kine Kidishitu.
Bifundija Bible: Yesu wānene amba boba bayuka “Leza enka wa binebine” bakatambula madyese. (Yoano 17:3) Shi Leza i kikata kifyame, le tukamuyuka namani? Pa kyaba kya kwifya, Leza usakanga muntu ne muntu amuyuke.—Yelemia 31:34.
Shako, ketukayukapo kanda konso katala Leza. Mwanda mifwatakanyo ne mashinda andi adi peulu kupita etu.—Musapudi 3:11; Isaya 55:8, 9.
Kuyuka bubinebine mokubwaninya kukukwasha: Shi Leza i kikata kifyame kekiyukibwa, mwanda waka tukimbe kumuyuka? Bine, ketulombepo enka tumuyuke kete, ino usaka tutamije kipwano kyetu nandi. Leza wātelele Abalahama muntu wa kikōkeji amba: “Mulunda nami.” Kadi Davida Mulopwe wa Isalela wālembele amba: “Bupwani bwa Yehova budi ku boba bamwakaminwe.”—Isaya 41:8; Mitōto 25:14.
Bantu balanga amba kebikokejikapo kupwana bininge na Leza, le i amo? Tala binena Bilongwa 17:27 amba: “[Leza] kadipo ne kulampe kwine na bātwe bonso, mhm.” Namani? Aye witupanga byonso byotusakilwa kupityila ku Bible amba tumuyuke biyampe. *
Witulombolanga dijina dyandi amba i Yehova. (Isaya 42:8) I musonekeje bilongwa byandi ku muzo wa muntu pa kusaka amba tumuyuke i Muntu wa muswelo’ka. Kadi Leza i mwitulombole mwiivwanino wandi. I Leza “muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo.” (Divilu 34:6) Bilongwa byetu bikokeja kumusangaja nansha kumufityija mutyima. Kimfwa, muzo wa Isalela wa kala ‘wāmufītyije ku mutyima’ kitatyi kyo wāmutombokele, inoko boba bāmukōkele na tunangu bāmutōkeje ku mutyima.—Mitōto 78:40; Nkindi 27:11.
[Kunshi kwa dyani]
^ Pa kuyukila’ko myanda mikwabo inena Bible padi Leza, tala shapita 1 wa dibuku Lelo I Bika Bine Bifundija Bible? dilupwilwe na Batumoni ba Yehova.
[Bushintuludi pa paje 4]
Shi Leza i kikata kifyame kya Busatu Busantu, le tubwanya kumuyuka namani?
[Kutambile Kifwatulo pa paje 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International
