1 D pa tõe n bãng Wẽnd ye—Yaa sɩd bɩ?
1 D pa tõe n bãng Wẽnd ye—Yaa sɩd bɩ?
Tõe tɩ y wʋma b sẽn yet tɩ: “Wẽnnaam yɛlã yaa yel-soalma.”
Tõe tɩ b yeela yãmb tɩ Wẽnnaam tʋʋmã yaa yel-soalma, la t’a sẽn yaa a soabã yɩɩda ninsaal bãngr hal zĩig sẽn zãre, tɩ d pa tol n tõe n bãng-a ye. Tõe tɩ kẽer yeela yãmb tɩ Wẽnnaam yaa mens a tãabo, la tɩ d pa tõe n wʋm rẽ me võor ye.
Biiblã sẽn yete: A Zezi yeelame tɩ neb nins sẽn na n ‘bãng sɩd Wẽnnaam sẽn ka to’ wã na n paama barka. (Zã 17:3) La wãn to la d tõe n bãng Wẽnnaam, sã n mik tɩ ned pa tol n tõe n bãng-a? Wẽnnaam pa solg a sẽn yaa a soabã ye. A pʋd n datame tɩ nebã fãa bãng-a.—Zeremi 31:34.
Yaa vẽeneg tɩ d pa tõe n bãng bũmba fãa Wẽnnaam zug ye. Bala a soayã la a tagsa wã yɩɩda tõnd rẽndã.—Koɛɛg Soaba 3:11; Ezai 55:8, 9.
Sɩdã bãngr sẽn na n sõng yãmb to-to: Sã n mik tɩ ned pa tol n tõe n bãng Wẽnnaam, dẽnd pa tar yõod tɩ d bao n na n bãng-a wɛ! Wẽnnaam yaool n sõngda tõnd tɩ d tõe n bãng-a, la d tõe n paam a zoodo. Wẽnnaam boola a Abrahaam sẽn yɩ wẽn-sakdã t’a “zoa.” Israɛll rĩm a Davɩɩd me yeela woto: ‘Zusoabã zood yaa neb nins sẽn zoet bãmbã yĩnga.’—Ezai 41:8; Yɩɩl Sõamyã 25:14.
Tõe tɩ y tagsdame tɩ Wẽnnaam zood paoong yaa bũmb sẽn pa tol n tõe. La Tʋʋm 17:27 yaool n yetame tɩ ‘Wẽnnaam ka zãr ne tõnd fãa ye.’ Bõe yĩng tɩ b yet woto? Bala, ne Biiblã maasem, Wẽnnaam sõngda tõnd tɩ d tõe n bãng-a sõma. *
Wẽnnaam togsa tõnd t’a yʋʋr la a Zeova. (Ezai 42:8 *) Biiblã pʋgẽ, Wẽnnaam wilga tõnd a manesem sẽn yɩ to-to ne ninsaalba, tɩ tõe n sõng-d tɩ d bãng a sẽn yaa Wẽnnaam ning buudã. Sẽn paase, a yeelame t’a yaa ‘nimbãan-zoet la bark kõata, t’a sũur ka yikd tao-tao, t’a nonglmã yaa wʋsgo, la t’a yaa sɩd soaba.’ (Yikri 34:6, 7) Tõnd manesmã tõe n sãama a sũur wall noog a sũuri. Wala makre, pĩnd Israɛll nebã sẽn wa n kɩɩs-a wã, b ‘sãama a sũuri,’ la neb nins sẽn sakd-a wã noogda a sũuri.—Yɩɩl Sõamyã 78:40; Yelbũna 27:11.
[Tẽngr not rãmbã]
^ sull 7 Y sã n dat n bãng Biiblã sẽn yet bũmb ning Wẽnnaam zugã n paase, bɩ y karem Biiblã sɩd yetame tɩ bõe? sebrã sak a 1 wã. A Zeova Kaset rãmbã n yiis seb-kãngã.
^ sull 8 Vɛrse kãngã pʋgẽ, Wẽnnaam Sebre yetame tɩ ‘Zusoaba,’ la pipi Biibl nins b sẽn gʋls ne hebre wã pʋgẽ, yaa a yʋ-peellã sẽn yaa ‘Zeova’ wã la b ning-yã.
[Goam sẽn tar pãnga, seb-neng a 4]
Wẽnnaam sã n yaa mens a tãab tɩ d pa tõe n wʋm rẽ võore, wãn to la d tõe n bãng-a?
[Fotã sẽn yitẽ]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International
