1 Modimo ga a Hlathege—Na ke Therešo?

Seo o ka bago o se kwele: “Modimo ga a kwešišege.”

“Tate ga a Kwešišege, Morwa ga a Kwešišege le Moya o Mokgethwa ga o Kwešišege.”—Tumelo ya Athanasius, ye e hlalosago thuto ya Boraro Botee yeo e rutwago ke dikereke tše dintši tša Bojakane.

Seo Beibele e se rutago: Jesu o itše bao ba ‘tsebago Modimo a nnoši wa therešo’ ba tla hwetša ditšhegofatšo. (Johane 17:3) Eupša re ka tseba Modimo bjang ge e ba a sa hlathege? Go e na le gore a ikute, o nyaka gore batho ka moka ba mo tsebe.—Jeremia 31:34.

Ke therešo gore re ka se tsoge re tsebile dilo ka moka ka Modimo. Re ka letela se ka gobane menagano le ditsela tša gagwe di phagametše tša rena.—Mmoledi 3:11; Jesaya 55:8, 9.

Kamoo go tseba therešo go go thušago ka gona: Ge e ba Modimo e le sephiri seo se sa kwešišegego, gona ke ka baka la’ng re swanetše go leka go mo tseba? Lega go le bjalo, ga a dire feela gore re kgone go mo kwešiša eupša gape o dira gore re be le tswalano ya kgauswi le yena. Modimo o hlalositše monna yo a botegago e lego Aborahama ka go mmitša “mogwera wa ka,” gomme Kgoši Dafida wa Isiraele o ngwadile gore: “Tswalano ya kgauswi le Jehofa ke ya bao ba mmoifago.”—Jesaya 41:8; Psalme 25:14.

Na kgopolo ya go ba le tswalano ya kgauswi le Modimo e bonala e le e sa kgonegego? Mohlomongwe go ka bonala go le bjalo mathomong, eupša ela hloko seo Ditiro 17:27 e se bolelago ge e re: “[Modimo] ga a kgole le yo mongwe le yo mongwe wa rena.” Ka tsela efe? O re nea seo re se nyakago e le gore re mo tsebe gabotse a diriša Beibele. *

O re botša leina la gagwe la Jehofa. (Jesaya 42:8) O bolokile pego ya ditirišano tša gagwe le batho e le gore re tsebe gore ke Modimo wa mohuta mang. Go feta moo, Modimo o re utollela maikwelo a gagwe. Ke Modimo yo a “gaugelago le yo a šokelago, yo a diegago go galefa, yo a tletšego botho le therešo.” (Ekisodo 34:6) Ditiro tša rena di ka kgoma maikwelo a gagwe. Ka mohlala, setšhaba sa Isiraele sa bogologolo se be se mo “kweša bohloko” ge se be se rabela, mola bao ka bohlale ba mo kwago ba thabiša pelo ya gagwe.—Psalme 78:40; Diema 27:11.

[Mongwalo wa tlase]

[Ntlhakgolo go letlakala 4]

Re ka tseba Modimo e le ka kgonthe bjang ge e ba e le Boraro Botee bjoo bo sa hlathegego?

[Mothopo wa Seswantšho go letlakala 4]

The Trinity c.1500, Flemish School, (16th century)/​H. Shickman Gallery, New York, USA/​The Bridgeman Art Library International