1 Huku Omaelema Okuti Otyo Otyili?
1 Huku Omaelema Okuti Otyo Otyili?
Ove hamwe uhole okuiva okuti: “Onondyila mba Huku omaelema.”
“He kanoñgonokwa, Omona kanoñgonokwa, Ospilitu Sandu kainoñgonokwa.”—O Credo Atanasiano, ipopia konthele Youtatu Ukola, elongeso lionongeleya ononyingi Mbovakristau vomouye.
Oityi Ombimbiliya ilongesa: Jesus wati vana ‘vanoñgonoka Huku wike yotyotyili’ ovo vala mavakayambwa. (João 17:3) Mahi oñgeni matunoñgonoka Huku inkha oe omaelema? Huku keliholeka, oe uhanda kese munthu emunoñgonoke.—Jeremias 31:34.
Tyotyili, nalumwe matukanoñgonoka atyiho konthele ya Huku. Kamatutyivili mokonda omalusoke ae nonondyila mbae mbaya vali peulu tyipona mbetu.—Eclesiastes 3:11; Isaías 55:8, 9.
Oñgeni okunoñgonoka otyili konthele ya Huku matyikukuatesako: Inkha Huku omaelema ahanoñgonokwa, omokonda yatyi tuovolela okumonoñgonoka? Tyotyili, Huku ketukuatesako vala okumunoñgonoka, mahi tupu utukuatesako okukala omapanga ae. Huku waihana omulume wekolelo Abraiau okuti “epanga liange,” iya Ohamba David yo Isilayeli wahoneka okuti: “Oupanga na Jeova owa vana vena onthilo nae.”—Isaías 41:8; Salmo 25:14.
Okuti olusoke luokulinga oupanga na Huku kaluaviukile? Hamwe ongotyo usoka, mahi tala etyi Atos 17:27 ipopia: “[Huku] kekahi kokule na kese umwe puonthue.” Omonkhalelo patyi? Nombimbiliya, Huku wetuavela atyiho tuesukisa opo tumunoñgonoke nawa. a
Oe utupopila okuti enyina liae o Jeova. (Isaías 42:8) Huku watuma okuhoneka Mombimbiliya ovilinga alinga novanthu vae kohale, opo tunoñgonoke oñgeni atuwa. Haunene, Huku utupopila etyi tyimuhambukiswa netyi tyimunumanesa. Oe o Huku “yonkhenda, notyieve, wahanumana liwa, nokuna ‘okankhenda okanene, notyili.” (Êxodo 34:6) Etyi tulinga tyipondola okumuhambukiswa ine okumunumanesa. Mongeleka, elongo lio Isilayeli ‘liemuihamesile omutima’ etyi vemutyitukilapo, mahi vana vemutavela vemuhambukiswa.—Salmo 78:40; Provérbios 27:11.
[Onondaka Poutoi]
a Opo unoñgonoke vali konthele yetyi Ombimbiliya ipopia konthele ya Huku, tala okapitulu 1 komukanda Oityi Ombimbiliya Tyili Ilongesa? walingua no Nombangi mba Jeova.
[Onondaka Mbavilapo pefo 4]
Inkha Huku omaelema Outatu Ukola, oñgeni tyilityili tupondola okumunoñgonoka?
[Olutalatu Lualandwa pefo 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International
