1 Nyamenle Le Awozideɛ—Asoo Ɔle Nɔhalɛ?
1 Nyamenle Le Awozideɛ—Asoo Ɔle Nɔhalɛ?
Bie mɔ ka kɛ: “Nyamenle yɛ ye gyima nwanwane adenle zo.”
“Yɛnrɛhola yɛnrɛde kɛzi Selɛ ne, Ralɛ ne, nee Sunsum Nwuanzanwuanza ne de la abo.”—Kɛ Athanasia Diedi ne kilehile Nsa-Ko Nyamenle ne mɔɔ Keleseɛnemaanle ne anu asɔne dɔɔnwo die di anu la ɛne.
Mɔɔ Baebolo ne kilehile: Gyisɛse hanle kɛ menli mɔɔ kɛnwu “nɔhalɛ Nyamenle kokye ne” la, banyia nyilalɛ dɔɔnwo. (Dwɔn 17:3) Noko saa Nyamenle le awozideɛ a, ɛnee kɛ ɔkɛyɛ na menli anwu ye ɛ? Gyihova ɛnva ɔ nwo ɛnvea, emomu, ɔkpondɛ kɛ awie biala nwu ye.—Gyɛlɛmaya 31:34.
Nɔhalɛ nu, yɛnrɛhola yɛnrɛnwu Nyamenle anwo ninyɛne kɔsɔɔti. Ɔwɔ kɛ yɛte ɛhye abo ɔluakɛ ye nzuzulɛ nee ye ndenle kpogya tɛla yɛ.—Nolobɔvo ne 3:11; Ayezaya 55:8, 9.
Yɛnwu nɔhalɛ ne a kɛzi ɔboa yɛ la: Saa Nyamenle le awozideɛ mɔɔ yɛnrɛhola yɛnrɛde kɛzi ɔde la abo a, ɛnee duzu ati a ɔwɔ kɛ yɛbɔ mɔdenle bɔbɔ kɛ yɛbanwu ye ɛ? Noko, ɔboa yɛ ɔmaa yɛnwu kɛzi ɔde la na yɛ nee ye nyia agɔnwolɛvalɛ. Nyamenle hanle nɔhavo Ebileham anwo edwɛkɛ kɛ “me gɔnwo,” yɛɛ Yizilayɛ Belemgbunli Devidi hɛlɛle kɛ: Gyihova “fa bɛdabɛ mɔɔ bɛsulo ye la agɔnwolɛ.”—Ayezaya 41:8; Edwɛndolɛ 25:14.
Asoo sonla bahola ɔ nee Nyamenle ava agɔnwolɛ? Bie a yɛbade nganeɛ kɛ ɔnrɛyɛ boɛ, noko Gyima ne 17:27 ka kɛ: “Nyamenle nee yɛ nuhua biala avinli ande.” Kɛzi? Nyamenle dua Baebolo ne azo ɔmaa yɛ sa ka mɔɔ yɛhyia nwo na yɛanwu ye kpalɛ la. *
Ɔmaa yɛnwu ye duma Gyihova ne. (Ayezaya 42:8, NW) Yemaa bɛhɛlɛ kɛzi ɔ nee alesama luale la bɛdo ɛkɛ amaa yɛanwu Sonla holɛ ko mɔɔ ɔde la. Mɔɔ tɛla ɛhye la, Nyamenle maa yɛnwu ye nganeɛdelɛ. Ɔle “anwunvɔnezelɛ nee atiakunlukɛnlɛma,” ɔnva “ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi [ye] tɛkɛɛ.” (Adendulɛ 34:6) Yɛ nyɛleɛ kola ka ye nganeɛdelɛ. Kɛ neazo la, tete Yizilayɛma mɔɔ dele atua la manle “ɔlile nyane,” noko bɛdabɛ mɔɔ bɛnwunle nrɛlɛbɛ na bɛdiele ye la manle ɔ nye liele.—Edwɛndolɛ 78:40; Mrɛlɛbulɛ 27:11.
[Ɔ bo ɛkɛ ne edwɛkɛ]
^ ɛden. 7 Saa ɛkpondɛ mɔɔ Baebolo ne ka ye wɔ Nyamenle anwo la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 1.
[Edwɛkɛ mɔɔ bɛkpa wɔ mukelɛ 4]
Saa Nyamenle le Nsa-Ko awozinli nu debie a, ɛnee kɛ ɔkɛyɛ na yɛanwu ye ɛ?
[Nvoninli Ɛvileka wɔ mukelɛ 4]
Nsa-Ko ne c.1500, Flemish School, (ɛvoya 16)/H. Shickman Gallery, New York, USA / The Bridgeman Art Library International
