Loke hende sa bisa: “Dios ta obra na un manera misterioso.”

‘Ta imposibel pa hende komprondé e naturalesa di Dios Tata, Dios Yu i Spiritu Santu.’ Asina e kredo di Atanasio ta deskribí e doktrina di Trinidad ku hopi iglesia di kristiandat ta siña hende awe.

Loke Beibel ta siña: Hesus a bisa ku esnan ku “siña konosé . . . e úniko Dios berdadero” lo risibí bendishon. (Huan 17:3) Pero kon nos por siña konosé Dios si e ta un misterio? Wèl, nunka el a skonde su identidat pa nos; al kontrario, e ke pa tur hende konos’é.—Yeremías 31:34.

Ta klaru ku nunka nos lo por haña sa tur kos tokante Dios, pasobra su pensamentu- i kamindanan ta muchu mas elevá ku di nos.—Eklesiástes 3:11; Isaías 55:8, 9.

Kon e bèrdat ta yuda bo? Si Dios ta un misterio ineksplikabel, anto no tin sentido pa trata di siña konos’é, no ta bèrdat? Dios no solamente ta hasi posibel pa nos sa ken e ta, ma tambe pa nos por tin un amistat íntimo kuné. Dios a yama e hòmber fiel Abraham “mi amigu,” i Rei David di Israel a skirbi: “SEÑOR ta íntimo ku es ku respet’É.”—Isaías 41:8; Salmo 25:14, BPK.

Kisas bo ta pensa ku ta imposibel pa hende tin un amistat íntimo ku Dios. Esei por parse asina bèrdat. Pero wak kiko Echonan 17:27 ta bisa: “[Dios] no ta masha leu for di kada un di nos.” Den ki sentido e no ta leu? Wèl, nos tin su Palabra den kua el a laga registrá tur loke ta nesesario pa nos por siña konos’é. *

Por ehèmpel, Dios a laga nos sa ku su nòmber ta Yehova. (Isaías 42:8, NW) Ademas, Beibel ta konta nos kon Yehova ta trata ku humanidat pa nos por sa ki klase di Persona e ta. Es mas, Dios ta revelá su sintimentunan na nos. Beibel ta bisa ku Yehova ta un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat.” (Éksodo 34:6) Pues, loke nos ta hasi tin efekto riba Dios su sintimentunan. Por ehèmpel, e nashon di antiguo Israel a “hasié tristu” ora nan a rebeldiá kontra dje. Di otro banda, hende ku ta obedes’é ta hasié kontentu.—Salmo 78:40; Proverbionan 27:11.

[Nota]

[Komentario na página 4]

Si Dios ta parti di un Trinidat misterioso, kon nos por siña konos’é?

[Rekonosementu pa potrèt na página 4]

The Trinity c.1500, Flemish School, (16th century)/​H. Shickman Gallery, New York, USA / The Bridgeman Art Library International