1 Kitail Sohte Kak Wehwehkihla Koht—Mehlel Ieu Met?
1 Kitail Sohte Kak Wehwehkihla Koht—Mehlel Ieu Met?
Mwein ihme ke kin rongen: “Kitail sohte kin wehwehki koasoandi kan en Koht.”
Pelien lamalam tohto kin padahngki me kitail sohte kak uhdahn wehwehkihla Koht.
Dahme Paipel padahngki: Sises ketin mahsanih me “aramas akan en eseikomwihla, me komwihte Koht mehlel” pwe ren kak alehdi kapai en mour soutuk. (Sohn 17:3) Ahpw ia duwen atail kak esehla Koht ma ih koht emen me kitail sohte kak wehwehkihla? Koht sohte ketin karirihala pein ih, ahpw e ketin kupwurki aramas koaros en esehla ih.—Seremaia 31:34.
Mehlel me kitail sohte kak wehwehkihla soahng koaros duwen Koht. Kitail kak ese met pwehki audepen nan kupwure oh sapwellime wiewia kan ileilesang atail kan.—Eklesiasdes 3:11; Aiseia 55:8, 9.
Esehla padahk mehlel kin sewese kitail: Ma kitail sohte kak wehwehkihla Koht, eri ia kahrepen kitail en nantihong esehla ih? Koht sohte ihte ketin mweidohng kitail en wehwehkihla duwen ih ahpw e pil ketin mweidohng kitail en kakairada atail nanpwungmwahu reh. Koht kin ketin kamwarenki ohl lelepek Eipraam “kompoakepahi,” oh Nanmwarki Depit ntingihedi: “KAUN-O kin ketin kompoakepahnki irail kan me kin peikiong.”—Aiseia 41:8; Melkahka 25:14.
Mehlel ieu me kitail kak ahneki nanpwungmwahu rehn Koht? Kilang dahme Wiewia 17:27 mahsanih: “Koht sohte dohsang emenemen kitail.” Ia duwen atail ese met? Pwehki Koht ketikihong kitail sapwellime mahsen nan Paipel pwe kitail en wehwehkihla mwahu duwen ih. *
E ketin padahkihong kitail mware, Siohwa, de Iahweh nin duwen ekei kawehwehn Paipel koasoia. (Eksodus 6:3 *) E ketin padahkihong kitail nan Paipel duwen sapwellime wiewia kan ong aramas pwe kitail en esehla soangen Koht dah men Ih. Laudsang met, Koht ketin kasalehiong kitail sapwellime pepehm kan. E kin ketin “diren mahk oh kadek, me sohte kin mwadang lingeringerda, oh me diren limpoak-kadek oh mehlel.” (Eksodus 34:6) Atail wiewia kak kamwakid sapwellime pepehm. Karasepe, mahso, mehn Israel kan kin “kansensuwedihada” ih ni ahnsou me irail pelianda, ahpw irail kan me kin peikiong kin kaperenda ih.—Melkahka 78:40; Lepin Padahk 27:11.
[Nting tikitik kan me mi pah]
^ par. 7 Pwehn kalaudehla omw wehwehkihla dahme Paipel mahsanihki duwen Koht, kilang irelaud 1 en pwuhken Dahme Paipel Uhdahn Padahngki? me Sounkadehdehn Siohwa kan wiahda.
^ par. 8 Nan Kawehwehpen Lepin Mahsen kan nan Paipel en Pohnpei: “KAUN-O – Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”
[Blurb nan pali 4]
Ma kitail sohte wehwehki duwen Koht, eri ia duwen atail kak uhdahn esehla ih?
[Kilel Credit Line nan pali 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International