1 Dios imanö kanqanqa manam musyëtsu ¿Rasumpatsuraq o manatsuraq?
1 Dios imanö kanqanqa manam musyëtsu ¿Rasumpatsuraq o manatsuraq?
Wakinkuna niyanqan: “Dios imanir imatapis ruranqanqa manam musyëtsu”.
“Hukllëllam rasumpa kaq Diosqa, alläpa hatun y mana imëpis cambiaq, mana musyëpaq, llapanta puëdeq y imanö kanqan mana willakïpaq, tsëqa Teyta, Tsuri y Santo espïritum” nishpam Catecismo de la Iglesia Católica nishqan willakun kimaq dios hukllëllachö kanqampaq parlarnin.
Biblia yachatsikunqan: Jesusqa nirqan rasumpa kaq Diosta reqeq kaqkunaqa atska bendicionkunata chaskiyänampaq kaqtam (Juan 17:3). Pero ¿imanöraq Diosta reqishwan pë imanö kanqan mana musyëpaqnö kaptinqa? Imanö kanqanta mana musyatsikunampa rantinqa, llapan nunakuna reqiyänantam pëqa munan (Jeremías 31:34).
Awmi, Dios imanö kanqantaqa manam paqwë musyëta puëdentsiktsu, pëpa rurëninkuna y pensëninkunaqa más hatunmi (Eclesiastés 3:11; Isaías 55:8, 9).
¿Imanötaq yanapashunki rasumpa kaqta musyë? Dios imanö kanqan mana musyëpaqnö kaptinqa, ¿munashwantsuraq ichikllapis reqita? Rasun kaqchöqa, Diosqa manam reqinallapaqtsu yanapamantsik, sinöqa pëwan amigo kanapaqwanmi. Diosqa “amïgö” nirqanmi sirveqnin Abrahanpaq, y rey Davidnam, “Jehoväwan kuyë amigo këqa pëta mantsaqkunallapaqmi” nir qellqarqan (Isaías 41:8; Salmo 25:14).
¿Alläpa sasatsuraq Dioswan alli amigo këman chëqa? Itsa tsëta ras pensarishwan. Pero Hechos 17:26, 27 texto ninqannöpis, “Diosta reqinantsicpaqqa manam allapa sasatsu”. ¿Imanir mana? Porque Bibliachömi tarintsik Diosta alli reqinapaq yachatsikïkunata. *
Bibliaqa yachatsikun Diospa shutin Jehová kanqantam (Isaías 42:8). Y pë imanö kanqanta más musyanapaqqa, nunakunata imanö tratanqantam Bibliaman qellqatsishqa. Hinamampis sentimientoyoq kanqantam musyatsimantsik. Pëqa “alläpa ankupäkoq [llakipäkog], y alläpa alli, mana ras piñakoq y alläpa kuyakoq y paqwë rasun kaq” Diosmi (Éxodo 34:6). Ruranqantsikkunaqa kushitsinmanmi o llakitsinmanmi. Këllaman yarpärishun, unë witsan israelïtakunaqa “alläpam shonqunta nanatsiyarqan” mana wiyakoq karnin. Pero alli pensëkur-raq imatapis ruraq y pëta wiyakoqkunaqa alläpam kushitsiyan (Salmo 78:40; Proverbios 27:11).
[Päginapa ura kuchunchö willakï]
^ par. 7 Diospaq Biblia imakunata yachatsikunqantaqa tarinki, Rasumpëpaqa, ¿imatataq Biblia yachatsikun? libropa 1 kaq capïtulonchömi, kë librotaqa Jehoväpa testïgonkunam rurayämushqa.
[4 kaq päginachö ninqan]
Kimaq Dios hukllëllachö kaptin y imanö kanqan mana musyëpaqnö këkaptinqa, ¿imanöraq pëta reqishwan?
[4 kaq päginachö pikunapa kanqan]
The Trinity (c. 1500), escuela flamenca (siglo XVI) / H. Shickman Gallery, (Nueva York, EE.UU.) / The Bridgeman Art Library International
