1 E Lē Mailoa le Atua—Pe e Moni?

Aʻoaʻoga atonu na e faalogo i ai: “E lē mailoa auala e galue ai le Atua.”

“E matuā faigatā ona malamalama i le Tamā, le Alo ma le Agaga Paia.”—The Athanasian Creed, o loo faamatala ai le Tasitolu lea ua aʻoaʻoina e le tele o lotu ua faapea mai o Kerisiano.

Le aʻoaʻoga a le Tusi Paia: Na fetalai Iesu e faapea, o i latou e “iloa . . . le Atua moni e toʻatasi” o le a mauaina faamanuiaga. (Ioane 17:3) Ae e faapefea ona tatou iloa le Atua pe afai e lē mailoa e se tasi o ia? E na te lē natia o ia lava, ae e finagalo ina ia iloa e tagata uma o ia.—Ieremia 31:34.

O le mea moni, e lē taitai ona tatou iloa mea uma e uiga i le Atua. O le mea lenā e tatou te faatalitalia ona e maualuluga ona manatu ma ona ala, i lo o o tatou manatu.—Failauga 3:11; Isaia 55:8, 9.

Aogā o le iloaina o aʻoaʻoga moni: Pe afai e lē mafai e tagata ona malamalama i le Atua, e leai la se uiga o le taumafai e iloa o ia. Peitaʻi, e lē gata ua ia tuu mai le avanoa e iloa ai o ia, ae o le avanoa foʻi e tatou te maua ai se faigāuō vavalalata ma ia. Na faamatalaina e le Atua le tagata faatuatua o Aperaamo e faapea, o “laʻu uō,” ma na tusi le tupu o Isaraelu o Tavita: “E vavalalata iā Ieova i latou o ē e matataʻu iā te ia.”—Isaia 41:8; Salamo 25:14.

Pe e faigatā ona talitonu i le manatu o le mauaina o se faigāuō vavalalata ma le Atua? Atonu e faigatā, ae e lelei pe a mātau le manatu i le Galuega 17:27 e faapea: “E lē o mamao [le Atua] mai iā i tatou taʻitoʻatasi.” E faapefea? Ua saunia mai e le Atua e ala i le Tusi Paia, ia faamatalaga e tatou te manaʻomia ina ia iloa lelei ai o ia. *

Ua ia faailoa mai iā i tatou lona suafa, o Ieova. (Isaia 42:8) Ua ia faamauina i le Tusi Paia le auala na feutagaʻi ai ma tagata, ina ia tatou iloa ai le ituaiga o Atua e iai o ia. E sili atu i lenā, ua faailoa mai foʻi e le Atua iā i tatou ona faalogona. O ia o sē e “alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni.” (Esoto 34:6) O a tatou gaoioiga e mafai ona aafia ai ona faalogona. O se faataʻitaʻiga, ona o le fouvale o le nuu o Isaraelu anamua, na latou “faatigā” ai lona finagalo, ae na faafiafiaina o ia e i latou o ē na filifili ma le atamai e usiusitaʻi.—Salamo 78:40; Faataoto 27:11.

[Faaopoopoga i lalo]

[Ata i le itulau 4]

Afai o le Atua o se Tasitolu e lē mailoa, e faapefea la ona tatou iloa lelei o ia?

[Ata i le itulau 4]

The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International