1 Wi no o man kon sabi Gado noiti​—A sani dati tru?

Kande yu yere sma e taki: „Den pasi fu Gado dangra.”

„Wi no man frustan suma na a Tata, suma na a Manpikin, èn suma na a Santa Yeye.”​—The Athanasian Creed, wan buku fu a Lomsu Kerki di e taki fu a Dri-wánfasi di furu kerki fu Krestenhèit e leri sma.

San Bijbel e leri wi: Yesus ben taki dati den sma di e ’leri sabi a wan-enkri tru Gado’ o kisi blesi (Yohanes 17:3). Ma fa wi kan kon sabi Gado efu wi no man frustan suma na en? We, Gado no e kibri gi wi. Na presi fu dati a wani taki ibri sma kon leri sabi en.​—Yeremia 31:34.

A no de fu taki dati noiti wi o man kon sabi ala sani fu Gado. Wi kan frustan dati, fu di den pasi nanga den prakseri fu en hei moro den di fu wi.​—Preikiman 3:11; Yesaya 55:8, 9.

A wini di a abi te yu sabi san tru: Efu a de so taki wi no o man frustan suma na Gado, dan na fu soso wi ben o du muiti fu kon sabi en. Ma te yu luku en bun, dan Gado no wani nomo taki wi kon frustan suma na en, ma a wani tu taki wi kon abi wan bun matifasi nanga en. Gado ben kari a reti-ati man Abraham „mi mati”, èn Kownu David fu Israel ben skrifi: „Na den wan di abi bigi lespeki gi Yehovah kan de bun mati fu en” (Yesaya 41:8; Psalm 25:14).

Yu denki taki libisma no kan kon abi wan bun matifasi nanga Gado? We, kande dati na a fosi sani di yu e prakseri, ma luku san Tori fu den apostel 17:27 e taki: „[Gado] no de fara fu nowan fu wi” (Tori fu den apostel 17:27). Fa so? Gado gi wi Bijbel fu yepi wi fu kon sabi en bun. *

Gado e fruteri wi taki en nen na Yehovah (Yesaya 42:8). A meki sma skrifi sortu sani a du gi libisma, so taki wi kan kon sabi moro bun sortu Gado a de. Ma san moro prenspari, na taki Gado e meki wi kon sabi fa a e firi son leisi. Bijbel e taki dati a de ’wan Gado di abi sari-ati nanga switifasi, taki en ati no e bron esi, taki a abi bun-ati pasa marki, èn taki ala ten a e du san a e taki’ (Eksodes 34:6). Den sani di wi e du kan meki Gado firi sari noso prisiri. Fu eksempre, di na owruten pipel Israel ben opo ensrefi teige Gado, dan dati ben „hati en”, aladi den wan di ben koni nofo fu gi yesi na en, ben meki a prisiri.​—Psalm 78:40; Odo 27:11.

[Futuwortu]

[Prenspari pisi na tapu bladzijde 4]

Efu Gado na wan Dri-wánfasi di wi no man frustan, dan fa wi o man kon sabi En trutru?

[Sma di abi a reti fu a prenki na tapu bladzijde 4]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International