2 Kot Ese Wesewesen Chchüngükich—Itä Mi Pwüng Ena?
2 Kot Ese Wesewesen Chchüngükich—Itä Mi Pwüng Ena?
Eli, iei met ka fen rongorong: “Ika pwe Kot a wesewesen chchüngü aramas, iwe epwe amoielo minne mi ngaw me riäfföü seni fönüfan. Inaamwo ika a äfänni chon fönüfan, nge ese ekieki nonnomui.”
Ifa äitien ewe Paipel: Jiowa Kot ese efisi minne mi ngaw. (Jemes 1:13) Inaamwo ika i a tongeni amoielo minne mi ngaw, nge a mut ngeni ei ototen aramas mi ngaw an epwe chüen nonnom tori ikenäi pwe epwe pwälo pwüngün än Kot nemenem me tuppwölün aramas, ekkewe mettoch Setan a epiietä le poputään manauan aramas. Kot epwe fokkun mwöküt fän iten aramas me amoielo meinisin mettoch mi efisi osukosuk mi pop seni chokkewe mi ü ngeni an nemenem.—Keneses 3:1-6; Aisea 65:17. *
Kot a pwäraalo an chchüngü aramas me an enletin tongei emön me emön kich. Mattu 10:29-31 a äweweei pwe Kot a äfänni ekkewe mettoch mi nom rech pwal mwo nge ekkewe sise silei, iei met a apasa: “Ifa usun, aramas resap amömöla ruoman nichok ren eföü chök kapa? Sap mwo nge eman nichok epwe turutiu lepwül lükün tipen Sememi. Nge meten möküremi kewe mwo nge ra lea meinisin. Iei mine ousap niuokus, ämi oua aüchea seni chomong nichok!”
Om silei ewe enlet epwe älisuk: Sise mochen chiechi ngeni ekkewe mi arochongaw me rese chchüngü aramas. Ina popun, ewe pworaus mi chofona pwe Kot ese chchüngü aramas a efisi än chommong resap mochen silei Kot are repwe chök köri lupwen ra osupwang. Om silei pwe Kot a chünguk epwe älisuk le mochen alapaalo om silei usun i me chiechi ngeni.
Ren chök äwewe, eli ka fen iotek ngeni Kot nge ka tipemwaramwar ika epwe aüseling are epwe pölüweni om iotek. Ewe Paipel a alükülükükich pwe ewe ‘Chon Aüselinga iotek,’ a akkaüseling ngeni iotekin chokkewe mi letip wenechar.—Kölfel 65:2.
Kot a etiwok om kopwe ‘iseta won i mettoch meinisin, minne ka aurek ren, pun a fen tongeok.’ (1 Piter 5:7, TF) Sia tongeni lükülük pwe Kot a äfännikich pwal mwo nge atun riäfföü watte ren alon ei: “Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.”—Kölfel 34:18.
[Pwóróus fan]
^ par. 3 Ren pwal ekkoch pworaus ika pwata Kot a mutatä riäfföü, ppii ewe puk Met ewe Paipel A Wesewesen Apasa? sopwun 11.
[Ekis Pwóróus lón pekin taropwe 5]
Ika Kot ese chchüngükich, pwata chök a etiwakich ach sipwe iotek ngeni?
