2 Abasi Ikereke Iban̄a Nnyịn—Ndi Emi Edi Akpanikọ?

Ekeme ndidi emesikop ẹdọhọde ẹte: “Edieke Abasi ekpekerede aban̄a nnyịn, enye okposio idiọkn̄kpọ ye ndutụhọ efep ke ererimbot emi. Ndien idem ekpededi enye ekere aban̄a mbon en̄wen, enye ikereke iban̄a mi.”

Se Bible ekpepde: Idịghe Jehovah Abasi edi ntak idiọkn̄kpọ. (James 1:13) Jehovah enyene odudu ndisio idiọkn̄kpọ mfep ini ekededi emi enye amade, edi enye ayak idiọkn̄kpọ aka iso odu man ẹkpebiere eneni oro ẹkenenide ke In̄wan̄ Eden. Ama ekem, enye ayanyan̄a ubonowo onyụn̄ etre ofụri idiọkn̄kpọ oro mbon emi mîmaha ukara esie ẹnamde.—Genesis 3:1-6; Isaiah 65:17. *

Abasi ekere aban̄a kpukpru nnyịn, onyụn̄ enen̄ede ọdiọn̄ọ owo nnyịn kiet kiet. Matthew 10:29-31 owụt ke Abasi akam ọfiọk nnyịn akan nte nnyịn ifiọkde idem nnyịn. Itien̄wed oro ọdọhọ ete: “Nte owo inyamke akadan̄abasi iba ke okudọk okụk kiet? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”

Nte ndifiọk akpanikọ an̄wamde nnyịn: Nnyịn isimaha ndisan̄a n̄kpere mbon oro ẹsọn̄de ido mînyụn̄ ikereke iban̄a mbon en̄wen. Nsu emi ẹsude ẹdori Abasi ẹte ke enye ikereke iban̄a nnyịn iyakke ediwak owo ẹma ndikop n̄kpọ ndomokiet mban̄a Abasi, ndien idem mbon eken oro ẹkade ufọkabasi ẹnyụn̄ ẹka ke “nnam didie.” Ndifiọk ke Jehovah Abasi enen̄ede ekere aban̄a fi ekeme ndinam oyom ndikpep ekese mban̄a enye nnyụn̄ ndi ufan esie.

Ke uwụtn̄kpọ, ekeme ndidi ama ọbọn̄ akam ọnọ Abasi edi ekere m̀mê enye akam okop akam imọ m̀mê enye ayakam ọbọrọ. Bible anam inen̄ede ifiọk ke Abasi emi edide “Andikop akam” akam oyoyom kpukpru mbon oro ẹnen̄erede ẹma imọ ẹsibọn̄ akam ẹnọ imọ kpukpru ini.—Psalm 65:2.

Abasi ọdọhọ ‘itop kpukpru editịmede esịt nnyịn idori imọ ke idem, koro imekere iban̄a nnyịn.’ (1 Peter 5:7) Ndien idem ke ini nnanenyịn, oyom idiọn̄ọ ke enye ekere aban̄a nnyịn, sia Ikọ esie ọdọhọ ke “Jehovah emekpere mmọ eke esịt obụn̄ọde; Enye onyụn̄ anyan̄a mmọ eke spirit mmọ anuahade.”—Psalm 34:18.

[Ikọ Idakisọn̄]

[Se ẹwetde ke ikpọ abisi ke page 5]

Edieke Abasi mîkpekereke iban̄a nnyịn, nso ikpanam enye ọdọhọ isibọn̄ akam inọ imọ?