2 Nzambi Kekudibanzaka Ve Sambu na Beto—Keti Yo Kele Kyeleka?

Mambu yina ziku nge mewaka: “Kana Nzambi vandaka kudibanza sambu na bantu, yandi zolaka kukatula mambi mpi bampasi na nsi-ntoto. Mpi, ata yandi kekudibanzaka sambu na bantu yonso, yandi ketulaka ve dikebi na mambu yina kekuminaka konso muntu.”

Mambu yina Biblia kelongaka: Yehowa Nzambi kevandaka ve na kisina ya mambi to ya bampasi. (Yakobo 1:13) Ata yandi lenda katula bampasi yai yonso na konso ntangu yina yandi mezola, yandi kepesaka nzila na bantu ya mbi ntangu yai sambu na kumanisa ntembe yina kubasikaka na luyantiku ya luzingu ya bantu. Nsukansuka, yandi tayidika mambu sambu na mambote ya bantu mpi takatula bampasi yonso yina baluyalu ya bantu mebasisaka.​—Kuyantika 3:1-6; Yezaya 65:17. *

Katula kudiyangisa sambu na bantu yonso, Nzambi ketulaka mpi dikebi ya mingi na konso muntu. Matayo 10:29-31, kemonisa nde yandi ketulaka dikebi na mambu ya fyoti-fyoti yina ata beto mosi kezabaka ve: “Keti bo ke tekaka bandeke zole ya fioti ve na kibende mosi ya fioti-fioti? Kansi ata ndeke mosi lenda bwa ve na ntoto kana Tata na beno me ndima ntete ve. Ata nsuki na beno ya ntu, Nzambi me tangaka yo yonso. Yo yina, beno kuwa boma ve; ata bandeke kele mingi, kansi beno me luta bo na mfunu.”

Mutindu kuzaba kyeleka lenda sadisa nge: Mbala mingi, beto kezolaka ve bantu yina kevandaka ntima mbi to kekudibanzaka ve sambu na bankaka. Yo keyitukisa ve na kumona nde, dibanza ya luvunu yina ketubaka nde Nzambi kekudibanzaka ve sambu na bantu, kepusaka bantu mingi na kubuya kuzaba yandi to na kukwenda penepene na yandi kaka ntangu bo kevandaka na mfunu ya lusadisu. Kuzaba nde, Yehowa Nzambi kekudibanzaka mpenza sambu na beto lenda pusa nge na kulonguka mambu mingi ya metala yandi mpi na kukumisa ngolo bangwisana na nge ti yandi.

Mu mbandu, yo lenda vanda nde ntangu nge vandaka kusambila Nzambi, nge vandaka kudiyula kana yandi vandaka kuwidikila nge to tapesa mvutu na kisambu na nge. Biblia kendimisa beto nde, “muntu yina kendimaka bisambu” kewidikilaka konso ntangu bisambu ya bayina kekwendaka penepene na yandi na masonga yonso.​—Nkunga 65:3.

Nzambi kelomba nge na ‘kupesa yandi mambu yonso yina keyangisa nge, sambu yandi muntu ke talaka mambu na nge.’ (1 Piere 5:7) Beto lenda tudila yandi ntima ata na bantangu ya mpasi, sambu Ndinga na yandi ketuba nde: “Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima.”​— Nkunga 34:19.

[Noti na nsi ya lutiti]

[Bangogo sambu na kubenda dikebi ya kele na lutiti 5]

Kana Nzambi kekudibanzaka ve sambu na beto, sambu na nki yandi kelomba beto na kusamba yandi?