Dak li għandek mnejn smajt: “Jekk Alla verament jimpurtah mill-​umanità, kieku jneħħi l-​ħażen u t-​tbatija mid-​dinja. U anki kieku jinteressah min-​nies inġenerali, ma jimpurtahx minn dak li jiġri lili.”

Dak li tgħallem il-​Bibbja: Alla Ġeħova ma jikkaġunax il-​ħażen. (Ġakbu 1:13) Filwaqt li jistaʼ jneħħi l-​ħażen meta jrid, hu qed jippermetti li s-​soċjetà korrotta teżisti għalissa sabiex iwieġeb mistoqsijiet li tqajmu fil-​bidu tal-​istorja umana. Fl-​aħħar mill-​aħħar se jaġixxi għall-​benefiċċju tal-​umanità u jneħħi l-​inkwiet kollu li qalgħu dawk li jiċħdu l-​ħakma tiegħu.—Ġenesi 3:1-​6; Isaija 65:17. a

Minbarra t-​tħassib ġenerali tiegħu għall-​familja umana, Alla juri interess kbir fina bħala individwi. Mattew 10:29-​31 juri li josserva dettalji dwarna li lanqas aħna stess ma nafuhom: “Ma jinbigħux żewġ għasafar tal-​bejt għal munita taʼ valur żgħir? Iżda lanqas wieħed minnhom ma jaqaʼ fl-​art mingħajr ma jkun jaf Missierkom. Għax saħansitra x-​xagħar taʼ raskom kollu hu magħdud. Għalhekk tibżgħux: intom tiswew iktar minn ħafna għasafar tal-​bejt.”

Kif jgħinek il-​fatt li tkun taf il-​verità: Aħna normalment nevitaw nies li huma kattivi jew li ma jimpurtahomx. Mela, mhux taʼ b’xejn li l-​gidba li Alla ma jimpurtahx iġġiegħel lil ħafna nies jevitaw għalkollox li jsiru jafuh jew inkella jersqu lejh biss meta jiġu daharhom mal-​ħajt. Il-​fatt li tkun taf li Alla Ġeħova verament jimpurtah jistaʼ jwasslek biex tkun trid titgħallem iktar dwaru u tiżviluppa ħbiberija miegħu.

Pereżempju, int għandek mnejn tlabt lil Alla imma ġejt f’dubju jekk hux jisimgħek jew jekk hux se jwieġbek. Il-​Bibbja taċċertana li s-​‘Semmiegħ tat-​talb’ iżomm dan il-​mezz taʼ komunikazzjoni miftuħ il-​ħin kollu għal dawk kollha li jersqu lejh b’mod sinċier.—Salm 65:2.

Alla jistiednek biex ‘titfaʼ l-​ansjetà kollha tiegħek fuqu, għax hu jimpurtah minnek.’ (1 Pietru 5:7) Anki fi żminijiet taʼ niket kbir nistgħu inkunu żguri mill-​interess tiegħu, għax il-​Kelma tiegħu tgħid: “Ġeħova hu qrib dawk li għandhom qalbhom maqsuma; u lil dawk bi spirtu miksur isalvahom.”—Salm 34:18.

[Nota taʼ taħt]

[Kumment f’paġna 5]

Jekk Alla ma jimpurtahx, għala jistidinna nitolbuh?