2 Koht Sohte Ketin Nsenohkin Kitail—Mehlel Ieu Met?
2 Koht Sohte Ketin Nsenohkin Kitail—Mehlel Ieu Met?
Mwein ihme ke kin rongen: “Ma Koht uhdahn ketin nsenohki aramas, eri e pahn ketikihsang suwed oh lokolok nin sampah. Ma e kin ketin nsenohki aramas, a ia duwen ngehi, e ketin nsenohkin ie?
Dahme Paipel padahngki: Kaidehn Siohwa Koht me ketin kahrehda suwed oh lokolok. (Seims 1:13) E kak ketikihsang me suwed ahnsou sohte lipilipil, ahpw e ketin mweidohng koasoandi suwed wet en mihmihte pwehn kapwungala ire me pid ihs me uhdahn ahneki pwuhng en kaunda me pwarada nan mwetuwel en Ihden. E pahn ketin wilian aramas akan oh ketikihsang soangen kahpwal koaros me kohsang irail kan me uhwongada sapwellime kaunda.—Senesis 3:1-6; Aiseia 65:17. *
Koht ketin nsenohki aramas oh e pil uhdahn ketin nsenohki emenemen kitail. Madiu 10:29-31 kasalehda Koht eh kin ketin tetehk ire pisetik kan en emenemen ni atail sohte kin ese. Paipel mahsanih: “Kumwail kak pwainkihda kisin menpihr riemen sens ehu; ahpw sohte emen ira pahn pwupwudiong nanpwel, ma Samamwail sohte ketin mweidohng. A ong kumwail, pil pitenmoangamwail koaros iangehr wadawadedi. Eri, kumwail dehr masak, pwe kumwail kesempwalsang mehlel menpihr tohto!”
Esehla padahk mehlel kin sewese kitail: Kitail sohte kin men ehuong aramas me kin lemei oh sohte nsenohkin kitail. Padahk likamw me dene Koht sohte ketin nsenohki aramas kahrehiongehr aramas tohto ren sohte men ehuong ih de peki sawas reh, ihte ma sohla douluhl arail koapworopwor. Atail ese me Siohwa Koht kin ketin nsenohkin kitail kak kahrehiong kitail en men kalaudehla atail esehla ih oh pil kompoakepahnkihla.
Karasepe, mwein ke kin kapakap ong Koht ahpw kin medemedewe ma e pahn ketin karonge de sapeng omw kapakap. Paipel kamehlelehiong kitail me e kin “ketin sapeng pekipek kan,” ihme kahrehda e kin ketin karonge kapakap en irail kan me kin kapakap ong ih ni mehlel ahnsou koaros.—Melkahka 65:2.
Koht ketin kupwurki ken ‘mweidohng ih omw pwunod koaros, pwehki eh kin ketin apwahpwalih iuk.’ (1 Piter 5:7) Kitail kak koapworopworki me e kin ketin nsenohkin kitail ni ahnsou me kitail kin nsensuwed laud, pwehki Paipel mahsanih: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.”—Melkahka 34:18.
[Nting tikitik me mi pah]
^ par. 3 Pwehn kalaudehla omw wehwehki dahme kahrehda Koht ketin mweidala lokolok, kilang irelaud 11 nan Dahme Paipel Uhdahn Padahngki?
[Blurb nan pali 5]
Ma Koht sohte ketin nsenohkin kitail, dahme kahrehda e luke kitail en kapakap ong ih?
