2 Diosqa manam yarpämantsiktsu ¿Rasumpatsuraq o manatsuraq?
2 Diosqa manam yarpämantsiktsu ¿Rasumpatsuraq o manatsuraq?
Wakinkuna niyanqan: “Noqantsikpaq Dios yarpararqa, llapan imëka mana allikunata y hipakïkunatachi Patsapita ushakäratsimunman. Y llapan nunakunapaq yarparpis, noqapaqqa manachi ni ichikllapis yarpantsu”.
Biblia yachatsikunqan: Tukï hipakïkuna kanqanqa manam Jehoväpa culpantsu (Santiagu 1:13). Llapan imëka mana allikunata ushakäratsita puëderpis, tukï mana allikuna pasanantaqa haqirishqa nunakuna kawar qallayanqan witsan tumpayanqan mana rasumpa kanqanta rikätsikunampaqmi. Pero ichikllachönam wiyakoq nunakunarëkur tukï allikunata ruramunqa, y Mandakïninta mana kaqpaq churaqkuna imëka mana allikunata rurayanqantam altsamunqa (Génesis 3:1-6; Isaías 65:17). *
Llapan nunakunapaqmi Diosnintsikqa yarparan, tsënö karpis, cada nunapaqpis yarparanmi. Mateo 10:29-31 ninqannöpis, Diosnintsikqa noqantsikchö rikan hasta kikintsik mana rikanqantsikkunatam, tsë textochöqa kënömi nin: “Pishqoqa ishqueran juc sentabupis cuestan. Tseno baratulla quecaptinpis, Dios Yaya mana permitiptenqa manam jucllellapis wanuyanqatsu. Y qamcunapatanäqa llapan aqtsequicunatapis jucllellapayan yupashqam quecatsin. Tseno quecaptenqa, ama imatapis mantsacuyëtsu. Porqui atsca pishqocunapitapis qamcunaqa masmi baliyanqui”.
¿Imanötaq yanapashunki rasumpa kaqta musyë? Ulikurkur o llullakurkur noqantsikpaq Dios mana yarpanqanta yachatsikuyaptinmi, mëtsikaq nunakuna pëpita ni imata musyëta munayantsu, o ashirpis ashiyan ima rurëtapis mana puëderllana. Y tsëqa rasunmi, mana kuyakoq ni ankupäkoq o llakipäkog nunakunawanqa manam juntakïllatapis munantsiktsu. Pero qamman Jehová yarparanqanta musyëqa, pëta reqinëkipaq y amïgon këta munanëkipaqmi yanapashunki.
Këman yarpäri, itsachi Diosman mañakunki, pero musyankitsu wiyashunqëkita o mana wiyashunqëkitapis. Pero rasun kaqchöqa, Jehoväqa “mañakïkuna Wiyaq” Diosmi, y llapan shonqunkunawan mañakoqkunataqa imëpis wiyëkanmi (Salmo 65:2).
Hinamampis Bibliaqa nimantsik llapan yarpachakïnintsikkunata Diosta willanapaqmi. ¿Imanir? Porque 1 Pedru 5:7 texto ninqannöpis, “Pëqa cuyecamantsicmi”. Tukï nakakïkunapa pasëkarpis pëmanqa mañakïta puëdentsikmi, Palabranchömi kënö nimantsik: “Shonqunkunachö nanatsikïkaqkunapa lädonchömi Jehoväqa këkan, y espïritunkunachö pasëpa llakishqa këkaqkunatam salvan” (Salmo 34:18).
[Päginapa ura kuchunchö willakï]
^ par. 3 Tukï hipakïkuna kananta Dios imanir rikaranqampaq parlaq yachatsikïtaqa tarinki, Rasumpëpaqa, ¿imatataq Biblia yachatsikun? libropa 11 kaq capïtulonchömi.
[5 kaq päginachö ninqan]
Noqantsikpaq Dios mana yarpararqa, ¿imanir-raq pëman mañakunapaq nimashwan?
