2 E Lē Manatu Mamafa Mai le Atua—Pe e Moni?

Aʻoaʻoga atonu na e faalogo i ai: “Afai e manatu mamafa moni mai le Atua, o le a ia aveesea la le leaga ma puapuaga mai lenei lalolagi. E tusa lava foʻi pe e alofa o ia i tagata uma, ae e lē o manatu mamafa mai i tagata taʻitoʻatasi.”

Le aʻoaʻoga a le Tusi Paia: E lē faapogaia e Ieova le Atua le leaga. (Iakopo 1:13) E ui e mafai ona ia aveesea mea leaga i so o se taimi, ae e na te lē o taofia faiga faapiʻopiʻo o loo iai, ina ia foʻia le finauga lea sa lāgā i le amataga o le talafaasolopito o tagata, e uiga i le pule silisili ese a le Atua ma le faamaoni o tagata. O le a gaoioi le Atua ina ia fesoasoani i tagata, ma aveesea mea leaga uma ua māfua ona o tagata o loo teena lana pulega.—Kenese 3:1-6; Isaia 65:17. *

E lē gata e manatu mamafa mai i tagata uma, ae ua faaalia mai foʻi e le Atua lona mātua naunau iā i tatou taʻitoʻatasi. E na te silafia mea uma e uiga iā i tatou e oo lava i mea e tatou te lē iloa e uiga iā i tatou lava, e pei ona faailoa mai i le Mataio 10:29-31 e faapea: “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. E oo foʻi i o outou lauulu, ua faitaulia uma. O lea la, aua neʻi outou fefefe: E sili atu ona tāua outou nai lo o tamaʻi manulele e tele.”

Aogā o le iloaina o aʻoaʻoga moni: E masani ona tatou ʻalofia tagata inainā pe e lē manatu mamafa mai foʻi. E lē o se mea e faateʻia ai, o le aʻoaʻoga pepelo e faapea e lē o manatu mamafa mai le Atua, ua māfua ai ona ʻalofia e tagata le iloaina o ia, pe e faalatalata atu foʻi iā te ia e tau lava o taimi ua leai ai se isi mea e mafai. O le iloaina e matuā manatu mamafa mai Ieova le Atua, e mafai ai ona fesoasoani iā te oe e iloa atili o ia ma maua sa oulua faigāuō vavalalata.

O se faataʻitaʻiga, atonu ua e tatalo i le Atua ae masalosalo pe o faafofoga mai o ia pe e tali mai foʻi. Ua faamautinoa mai i le Tusi Paia, e faafofoga mai i taimi uma le “Faafofoga tatalo” iā i latou uma e faalatalata atu iā te ia ma le faamaoni.—Salamo 65:2.

Ua valaaulia oe e le Atua ina ia “taʻu atu [ou] popolega uma iā te ia, auā o loo manatu mamafa mai o ia iā te [oe].” (1 Peteru 5:7) E mafai ona tatou faalagolago iā te ia i taimi o puapuaga, ona ua faapea mai lana Afioga: “E latalata mai Ieova iā i latou o ē e loto momomo; ma e faaola e ia i latou o ē ua loto nutimomoia.”—Salamo 34:18.

[Faaopoopoga i lalo]

[Ata i le itulau 5]

Afai e lē manatu mamafa mai le Atua, aiseā la e na te valaaulia ai i tatou e tatalo atu iā te ia?