2 Dios ni kinkapaxkiyan. ¿Pi xlikana?
2 Dios ni kinkapaxkiyan. ¿Pi xlikana?
Makgapitsi wankgo: «Komo Dios kinkapaxkiyan, xmasputulh tuku nitlan chu tapatin nema anan kkakilhtamaku. Chu maski xkalakgkatsalh latamanin, pero ni akxilha tuku kiʼakgspula akit».
Wantuku masiya Biblia: Jehová ni wa makgapatinan (Santiago 1:13). Maski tlan lakapala xmasputulh tuku nitlan anan, mastama talakaskin kalatamakgolh tiku lixkajni likatsikgo xlakata tlan nalakkaxtlawa taʼakglhuwit nema tawi akxni katlawaka xapulana latamanin. Namin kilhtamaku akxni nakamakgtaya latamanin chu nalakkaxtlawa tuku nitlan tlawakgo tiku ni kgalhakgaxmatkgo xlimapakgsin (Génesis 3:1-6; Isaías 65:17). *
Maski Dios putum latamanin kalakgkatsan, na akxilha tuku kinkaʼakgspulayan chatunu chatunu. Mateo 10:29-31 wan pi akxilha tuku akinin ni akxilhaw: «¿Tu tantuy laktsu [tsiktsi] okgxtum listakan? Pus maski chuna, ni tantum laktsu [tsiktsi] ntamakgwasa nkatiyatna, wa mpala pi ni wa xtalakaskin minTlat nti wi nkakgapun. Pus asta maski wa [minchixitkan], taputlakganit xlipaks. Chuna mpi ni kapikuantit; tlakg xaliwaka wixin nkgalhiyatit milakgasikan, ni xawa lhuwa laktsu [tsiktsi]».
La makgtayayan nakatsiya tuku xaxlikana: Xlakata tuku wankan pi ni kinkapaxkiyan, tlawa pi lhuwa ni nakatsiputunkgo xlakata Dios chu putsakgo kaj akxni nialh katsikgo tuku natlawakgo. Xlikana pi akxni tiku nitlan likatsi o lixkajni kinkakgalhtiyan, nipara talakatsuwiniputunaw. Pero akxni nakatsiya pi Jehová paxkiyan lu nalakgapasputuna chu miʼamigo natlawaputuna.
Akgtum liʼakxilhtit, akxni tlawaniya oración max lakpuwana komo nakgaxmatniyan o nakgalhti tuku skiniya. Pero Biblia wan pi Dios “kgaxmata oración” chu putum kilhtamaku tlan natachuwinankgo tiku xlikana putsakgo (Salmo 65:2).
Nachuna, Biblia wan pi kawaniw Dios putum tuku lilakgaputsamaw. ¿Tuku xlakata? 1 Pedro 5:7 wan pi “kinkamakgtayaputunan”. Tlan naputsayaw akxni lu lipuwamaw, xlakata xTachuwin wan: «Jehová lakatsu katawi tiku lu lipuwamakgolh; chu kalakgmaxtu tiku makgkatsikgo pi katlajama xtaʼakglhuwitkan» (Salmo 34:18, NM).
[Nota nema wi kpágina]
^ párr. 3 Xlakata tlakg nakatsiya tuku xlakata Dios mastama talakaskin kaʼanalh tapatin kaʼakxilhti libro ¿Tuku xlikana masiyay Biblia?, kcapítulo 11.
[Tuku wan página 5]
Komo Dios ni xkinkapaxkin, ¿tuku xlakata kinkawaniyan katlawaniw oración?
