2 Aita te Atua e tâuˈa maira—E parau mau anei?

Ua faaroo paha oe: “Ahiri te tâuˈa ra te Atua i te taata, ua ore ïa te ino e te mauiui. E mai te peu noa ˈtu e te haapeapea ra te Atua no te huitaata, no ˈu râ aita ïa.”

Te haapii ra te Bibilia: E ere o te Atua ra o Iehova te tumu o te ino. (Iakobo 1:13) E nehenehe oia e faaore i te ino. Tera râ, te vaiiho nei â oia i teie nei ao ino no te faaafaro i te parau rahi o te mea maitai e te mea ino tei faahapahia i te haamataraa o te huitaata. E ohipa mai iho â oia no te maitai o te taata ma te faaore i te mau fifi atoa e tupu ra no te patoiraa i ta ˈna faatereraa.—Genese 3:1-6; Isaia 65:17. *

Te tâuˈa ra te Atua i te huitaata e mea here roa na ˈna ia tatou taitahi. Te na ô ra te Mataio 10:29-31: “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eiaha ˈtu â ïa, ua hope atoa ra te rouru o to outou upoo na i te taiohia. Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu.” Ua ite iho â ïa te Atua i to tatou huru mau.

Faufaaraa ia ite i te parau mau: Eita iho â tatou e piri atu i te feia ino. Ua haavarehia te taata e mea ino te Atua. No reira ratou e ore ai e hinaaro e ite i te Atua. E pure râ ratou ia ˈna i roto noa i te fifi. Ia ite oe e te tâuˈa maira te Atua ra o Iehova, e hinaaro ïa oe e ite atu â ia ˈna, a faahoa ˈtu ai.

Ua pure paha oe i te Atua ma te ui, ‘E faaroo aore ra e pahono anei oia ia ˈu?’ Te haapapu maira te Bibilia e e nehenehe te feia aau haavare ore e paraparau i te mau taime atoa i te Atua tei faaroo i te pure.—Salamo 65:2.

Te ani nei te Atua ia oe ia ‘huri i to oe ahoaho atoa i nia ia ˈna, te tiai ra hoi oia ia oe.’ (Petero 1, 5:7) Ia au i te Salamo 34:18, “te fatata nei Iehova i te feia aau paruparu ra; e te faaora nei oia i te taata aau taiâ.” E tâuˈa iho â oia i te taata e ahoaho ra.

[Nota i raro i te api]

[Parau iti faaôhia i te api 5]

E ani mai anei te Atua ia pure ia ˈna ahani aita oia e tâuˈa maira?