2 Got e Gathi Ri Ma Lemnagdad​—Riyul’ e Re N’ey, Fa?

Sana kam rung’ag ni: “Faanra riyul’ ni ma lemnag Got e girdi’ ma ra chuweg gubin e kireb nge gafgow u fayleng. Mus ni faanra ma lemnag e girdi’ ni gubin, me gag e der ma lemnageg.”

N’en ni be fil e Bible: Jehovah ni Got e der ma k’aring e kireb. (James 1:13) Yugu aram rogon ni demtrug e ngiyal’ nrayog ni nge chuweg e kireb, machane ke pag e girdi’ ni ngar gagiyeggad ni bochan e nge tiriggil fare magawon ni sum aram u tabolngin chepin e girdi’, ni bay rogon nga mat’awun ko gagiyeg. Dabki n’uw nap’an me rin’ ban’en ni fan ko girdi’ me chuweg gubin e kireb ni be k’aring e piin ni dubrad e gagiyeg rok.​—Genesis 3:1-6; Isaiah 65:17. a

Gathi kemus ni ma lemnag Got gubin e girdi’, ya ku ma lemnag be’ nge be’. Matthew 10:29-31 e be dag ni mus nga nochi ban’en u murung’agdad ni dad nanged ma manang. Be gaar: “Rayog ni ngan chuw’iy l’agruw chi arche’ ni sparrow fithingan nga ba salpiy nrow; machane dariy taa bagayad nra mul nga but’ nde nang e Chitamangimed. Mus nga piyan lolugmed ni ke m’ay i theeg. Ere dab mu tamdaggad; ya ka ba ga’ famed ngak fa nochi arche’ ni sparrow fithingan!”

Rogon nra ayuwegem e tin riyul’: Ba ga’ ni gad ma palog ko girdi’ nib gel e thin rok, ara der ma lemnag e girdi’. Dab da gingad ngay ni fare thin ni Got e der lemnag e girdi’ e ke k’aring boor e girdi’ ni nge dab kur gayed rogon ni ngar nanged murung’agen ara fin ra math e liyeb ngorad e yad ra lemnag ni ngar ninged e ayuw ngak. Faan ga ra nang nri ma lemnagem Jehovah Got ma rayog ni nge k’aringem ngam adag ni ngam fil murung’agen me fel’ e tha’ u thilmew.

Bod rogon ni sana ga ma meybil ma ga ma lemnag ko ra motoyil ngay ara fulweg taban fa danga’. Be micheg e Bible ni faen ma rung’ag e “meybil” e ke bing e kanawo’ ngak e piin ni yad ba yul’yul’ nrayog ni ngar nonad ngak ni gubin ngiyal’.​—Psalm 65:2.

Be yog ni ngad ‘paged fan urngin e magafan’ rodad ngak, ya be lemnag rogodad.’ (1 Peter 5:7) Rayog ni ngad taga’gad ko re thin ney ni ki mada’ ko ngiyal’ ni ke yib e gafgow nib gel ngodad, ya be gaar e Bible: “I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.”​—Psalm 34:18, BT.

[Footnote]

[Blurb on page 5]

Faanra der ma lemnagdad Got, me ere mang fan ni be yog ni ngaud meybilgad ngak?