3 Ang Diyos Mapanimaslon—Tinuod ba Kana?
3 Ang Diyos Mapanimaslon—Tinuod ba Kana?
Ang imo tingaling nadunggan: “Timan-an sa Diyos ang matag sala sa mga tawo ug sakiton niya sila sa impiyerno sa walay kataposan.”
“Silotan sa Diyos ang mga makasasala pinaagig mga katalagman.”
Ang gitudlo sa Bibliya: Ang 2 Pedro 3:9 nag-ingon nga si Jehova “wala magtinguha nga adunay malaglag apan nagtinguha nga ang tanan makakab-ot sa paghinulsol.” Inay timan-an ang atong kasaypanan, iyang timan-an ang atong maayong buhat. ‘Ang mga mata sa Diyos nagalibotlibot sa tibuok yuta aron ipakita ang iyang kusog alang niadtong kansang kasingkasing maoy bug-os alang kaniya.’—2 Cronicas 16:9.
Ang kalayonhong impiyerno dili pagtulon-an sa Bibliya—dili buot sa Diyos nga sakiton ang mga tawo sa walay kataposan. Ang kinabug-atang silot nga iyang ipahamtang sa mga daotan mao ang kamatayon. (Jeremias 7:31; Roma 6:7) Ug ang mga katalagman, diin walay pili ang mangamatay, dili pagbuot sa Diyos kondili maoy wala-damhang panghitabo nga mahimong maagoman ni bisan kinsa.—Ecclesiastes 9:11.
Kon sa unsang paagi ang pagkahibalo sa kamatuoran makatabang nimo: Kita masuod sa Diyos kon atong masayran nga siya “andam sa pagpasaylo” ug dili dayon mohukom. (Salmo 86:5) Kita mag-alagad sa Diyos dili tungod kay kita mibating sad-an o mahadlok silotan. Hinunoa, ang labing maayong motibo sa pag-alagad kang Jehova mao ang gugma. Tungod niana, kita mapalihok sa pagbuhat sa atong kinamaayohan sa pagpahimuot kaniya.—Mateo 22:36-38; 1 Juan 5:3.
Bisag buot sa Diyos nga ang tanan mohimog maayo, siya nahibalo nga daghan ang dili gayod mobuhat niana. Kon dili siya molihok batok niadtong dili mobiya sa pagbuhat ug daotan, nan sama ra siya sa usa ka magmamando nga naghimog balaod apan wala magpatuman niana, nga nagtugot nga mokaylap ang inhustisya ug pag-antos. (Ecclesiastes 8:11) Ang pagkahibalo nga ang Diyos dili motugot nga magpadayon ang pagkadaotan hangtod sa hangtod maoy lig-ong basehanan sa atong paglaom. Ang Diyos nagsaad nga laglagon kadtong nagpadayon sa paghimog daotan, aron “ang mga maaghop” makatagamtam ug kinabuhing dayon sumala sa iyang orihinal nga katuyoan.—Salmo 37:10, 11, 29. *
[Footnote]
^ par. 7 Aron makakat-on ug dugang kon sa unsang paagi himoon sa Diyos ang yuta nga paraiso, tan-awa ang kapitulo 3 ug 8 sa librong Unsay Tinuod nga Gitudlo sa Bibliya?
[Blurb sa panid 6]
Buot ba sa Diyos nga simbahon nato siya tungod sa kahadlok nga silotan?
[Picture Credit Line sa panid 6]
Engravings by Doré
