3 Abasi Esima Ndimia Owo Ufen​—Ndi Emi Edi Akpanikọ?

Ekeme ndidi emesikop ẹdọhọde ẹte: “Abasi esiwewet kpukpru idiọkn̄kpọ emi mme owo ẹnamde obon, ekem ada oro otụhọde mmọ ke nsinsi ke ikan̄ hell.”

“Abasi esida unyekisọn̄ ye mme mme oto-obot afanikọn̄ eken amia mme anamidiọk ufen.”

Se Bible Ekpepde: Udiana Peter 3:9 ọdọhọ ke Jehovah “[iyomke] baba owo kiet atak edi oyom kpukpru owo ẹkabade esịt.” Enye isiwụkke enyịn ke mme ndudue nnyịn, edi esikam ese nti n̄kpọ emi inamde. Bible ọdọhọ ke “enyịn Jehovah [asasan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.”—2 Chronicle 16:9.

Bible ikpepke ite ke Abasi oyotụhọde mme owo ke ikan̄ hell sia utọ n̄kpọ emi akam etetek enye esịt. N̄kponn̄kan ufen emi Abasi ọnọde anamidiọk edi ndiwot enye. (Jeremiah 7:31; Rome 6:7) Ndien amaedi mme unyekisọn̄ ye mme oto-obot afanikọn̄ emi ẹsiwotde mme owo ntịme ntịme, idịghe Abasi edi ntak, Bible okot mmọ “n̄kpọntịbe unana idotenyịn” emi ẹkemede ndisịm owo ekededi.—Ecclesiastes 9:11.

Nte ndifiọk akpanikọ an̄wamde nnyịn: Ndifiọk ke Abasi esinyịme “ndifen nnọ” owo inyụn̄ isọpke ndibiom owo ikpe anam ikeme ndisan̄a n̄kpere enye. (Psalm 86:5) Ikpanaha inam n̄kpọ Abasi ke ntak ndịk m̀mê mbak enye edimia nnyịn ufen. Utu ke oro, ikpakam inam n̄kpọ esie ke ntak emi imade enye. Utọ ima emi ayanam nnyịn inam ofụri se ikekeme ndinem enye esịt.—Matthew 22:36-38; 1 John 5:3.

Okposụkedi emi Abasi oyomde kpukpru owo ẹnam se ifọnde, enye ọfiọk ke ediwak owo idimaha ndinam emi. Edieke Abasi okponyụn̄ asanade mme anamidiọk ayak ntre, ayak ndutụhọ ye idiọkn̄kpọ ẹka iso ke nsinsi, enye okponyụn̄ etie nte andikara emi owụkde ewụhọ edi idọn̄ke enyịn m̀mê mme owo ẹnịm ewụhọ oro m̀mê inịmke. (Ecclesiastes 8:11) Ndifiọk ke Abasi idiyakke idiọkn̄kpọ aka iso ke nsinsi anam inyene idotenyịn ke n̄kpọ ọyọfọn ke ini iso. Abasi ọn̄wọn̄ọ ndisobo mbon oro ẹkade iso ẹnam idiọkn̄kpọ, man “mbon nsụkidem” ẹdu uwem ke nsinsi ke isọn̄ emi nte enye okoyomde.—Psalm 37:10, 11, 29. *

[Ikọ Idakisọn̄]

[Se ẹwetde ke ikpọ abisi ke page 6]

Ndi Abasi oyom inam n̄kpọ esie ke ntak ndịk m̀mê mbak enye edimia nnyịn ufen?

[Ebiet Ẹdade Ndise Ẹto ke page 6]

Engravings by Doré