3 Ang Dios Matimaluson—Matuod Bala Ini?
3 Ang Dios Matimaluson—Matuod Bala Ini?
Ang mahimo nabatian mo: “Ginabantayan sang Dios ang tanan nga sala kag ginasilutan niya ang mga tawo sa impierno asta san-o.”
“Ang mga kalamidad silot sang Dios sa mga makasasala.”
Ang ginatudlo sang Biblia: Ang 2 Pedro 3:9 nagasiling nga ‘indi luyag ni Jehova nga ang bisan sin-o malaglag kundi luyag niya nga ang tanan makadangat sa paghinulsol.’ Sa baylo nga bantayan ang aton mga sala, ginatan-aw niya ang maayo sa aton. “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”—2 Cronica 16:9.
Wala ginatudlo sang Biblia ang kalayuhon nga impierno kay ang pagpaantos sa mga tawo asta san-o ginakangil-aran sang Dios. Ang iya silot sa mga malauton amo ang kamatayon. (Jeremias 7:31; Roma 6:7) Ang mga kalamidad, nga nagahalit sa tanan, indi kahimuan sang Dios, kundi mga hitabo nga wala ginapaabot nga nagaapektar sa tanan.—Manugwali 9:11.
Kon paano makabulig sa imo ang paghibalo sang kamatuoran: Magasuod pa gid kita sa Dios kon batunon naton nga ‘handa sia sa pagpatawad’ kag wala dayon nagasilot. (Salmo 86:5) Wala kita nagaalagad sa Dios bangod ginakonsiensia kita ukon nahadlok nga silutan niya, kundi bangod sa aton gugma sa iya. Ina nga gugma magapahulag sa aton nga himuon ang aton masarangan para pahamut-an sia.—Mateo 22:36-38; 1 Juan 5:3.
Gusto sang Dios nga himuon sang tanan ang maayo, pero nahibaluan niya nga madamo ang indi maghimo sini. Silutan gid niya ang mga hungod nga nagahimo sing malain, kay kon indi niya ini paghimuon, mapaanggid sia sa isa ka manuggahom nga nagahimo sing kasuguan nga wala ginapatuman, gani nagalapnag pa gid ang inhustisya kag pag-antos. (Manugwali 8:11) Ang paghibalo nga indi pagtugutan sang Dios ang kalautan asta san-o nagahatag sa aton sing mabakod nga paglaum. Nagpromisa ang Dios nga dulaon niya ang padayon nga nagahimo sing kalautan para matigayon sang mga “mapainubuson” ang kabuhi nga wala sing katapusan sa duta suno sa iya orihinal nga katuyuan.—Salmo 37:10, 11, 29. *
[Nota]
^ par. 7 Para sa dugang nga impormasyon kon paano himuon sang Dios ang duta nga paraiso, basaha ang kapitulo 3 kag 8 sang libro nga Ano Gid ang Ginatudlo Sang Biblia?
[Blurb sa pahina 6]
Malipay ayhan ang Dios nga simbahon sia bangod lang nahadlok kita nga silutan niya?
[Picture Credit Line sa pahina 6]
Engravings by Doré
