3 Managibales ti Dios​—Pudno Kadi?

Ti mabalin a nangngegmon: “Sipsiputan ti Dios ti panagbasol ti tattao ket agnanayon a dusaenna ida idiay impierno.”

“Dusdusaen ti Dios dagiti managbasol babaen kadagiti natural a didigra.”

Ti isursuro ti Biblia: Kuna ti 2 Pedro 3:9 a ni Jehova “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” Imbes a dagiti laeng kamalitayo ti kitkitaenna, ipamaysana a kitaen dagiti naimbag a naaramidantayo. “Agsublisubli dagiti mata [ni Jehova] iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 Cronicas 16:9.

Saan nga isursuro ti Biblia nga adda impierno ta makarimon iti Dios ti sursuro nga agnanayon a panangtutuok. Ipapatay ti naan-anay a dusa dagiti nadangkes. (Jeremias 7:31; Roma 6:7) Ket saan met nga aramid ti Dios ti awan pilpilienna a panangdadael dagiti natural a didigra, imbes ketdi di mapakpakadaan dagitoy a pasamak a mabalin a mangapektar iti asinoman.​—Eclesiastes 9:11.

Ti maitulong kenka ti panangammom iti kinapudno: Makaadanitayo iti Dios no bigbigentayo a “sisasagana a mamakawan” ken saan a dagus a mangdusa. (Salmo 86:5) Agserbitayo koma iti Dios saan a gapu ta mariknatayo a nakabasoltayo wenno maamaktayo a madusa. Imbes ketdi, maaddaantayo koma iti natibker a pammati ken umiso a motibo iti panagserbi​—ti panagayat ken Jehova. Ti kasta nga ayat tignayennatayo a mangaramid iti amin a kabaelantayo a mangparagsak kenkuana.​—Mateo 22:36-38; 1 Juan 5:3.

Nupay kayat ti Dios nga agaramidtayo amin iti naimbag, ammona nga adu ti saan a mangaramid iti dayta. No saan nga agtignay maibusor kadagiti sipapakinakem nga agaramid iti dakes, awan nakaidumaanna iti agturay a mangaramid kadagiti linteg ngem dina met ipatungpal, a makagapu iti nasaknap a kinaawan hustisia ken panagsagaba. (Eclesiastes 8:11) Adda namnamatayo iti masanguanan ta ammotayo a saan nga agnanayon nga ipalubos ti Dios ti kinadakes. Inkarina nga ikkatenna dagidiay agtultuloy nga agaramid iti dakes, tapno “dagidiay naemma” siraragsak nga agbiagda nga agnanayon ditoy daga sigun iti orihinal a panggepna.​—Salmo 37:10, 11, 29. a

[Footnote]

[Blurb iti panid 6]

Kayat ngata ti Dios nga agdayawtayo kenkuana gapu laeng ta maamaktayo a madusa?

[Picture Credit Line iti panid 6]

Kitikit ni Doré