3 Nzambi Kelolulaka Ve Bantu—Keti Yo Kele Kyeleka?
3 Nzambi Kelolulaka Ve Bantu—Keti Yo Kele Kyeleka?
Mambu yina ziku nge mewaka: “Nzambi kelandilaka masumu yonso yina bantu kesalaka mpi kepesaka bo ndola ya mvula na mvula na bilungi ya tiya.”
“Nzambi kepesaka bantu ya masumu ndola na nzila ya bisumbula ya lugangu.”
Mambu yina Biblia kelongaka: 2 Piere 3:9 ketubaka nde, Yehowa “ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” Na kisika ya kutula dikebi na bifu na beto, yandi ketulaka dikebi na mambu na beto ya mbote. Nzambi “ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi mpenza.”—2 Bansangu 16:9.
Dilongi ya bilungi ya tiya mekatuka ve na Biblia, nkutu Nzambi kemengaka dibanza ya kunyokula bantu mvula na mvula na bilungi ya tiya. Ndola ya ngolo yina yandi tapesa bantu ya mbi kele kubotula bo dikabu ya luzingu. (Yeremia 7:31; Roma 6:7) Mpi bisumbula ya lugangu, yina kefwaka bantu kekatukaka ve na Nzambi kansi, yo kele mambu ya kukonda kukana yina kekuminaka bantu yonso.—Longi 9:11.
Mutindu kuzaba kyeleka lenda sadisa nge: Beto lenda kwenda penepene na Nzambi ntangu beto kezabaka nde, yandi kevandaka ya kuyilama sambu na ‘kuwila bantu mawa’ mpi kebedisaka bo ve nswalu. (Nkunga 86:5) Beto fwete sadila ve Nzambi sambu na boma ya mambu ya mbi yina beto salaka to boma ya kubaka ndola. Kansi, beto lenda yedisa lukwikilu na beto sambu na kuzola Yehowa. Zola ya mutindu yai kepesaka beto ngolo yina kepusaka beto na kusala yonso yina beto lenda sala sambu na kusepedisa yandi.—Matayo 22:36-38; 1 Yoane 5:3.
Ata Nzambi kezolaka nde, bantu yonso kusala mambu ya mbote, yandi kezabaka nde bantu mingi tasala yo ve ata fyoti. Kana yandi pesa ve ndola na bantu yina kesala mbi, yandi tavanda bonso mfumu yina ketulaka bansiku kansi yandi kesadilaka yo ve, mpi kebikaka nde kukonda lunungu mpi bampasi kukuma mingi. (Longi 8:11) Kuzaba nde, Nzambi tamanisa kimakulu mambi yonso kepesa beto kivuvu ya ngolo sambu na makwisa. Nzambi mesilaka nde, yandi tafwa bantu yina kelanda kusala mambi, na mpila nde “bantu yina ke kudikulumusaka” kubaka luzingu ya mvula na mvula awa na ntoto mutindu yandi kanaka tuka luyantiku.—Nkunga 37:10, 11, 29. *
[Noti na nsi ya lutiti]
^ par. 7 Sambu na kuzaba mambu mingi na mutindu yina Nzambi takumisa ntoto paladisu, tala kapu 3 mpi 8 ya mukanda Inki Biblia Kelongaka Mpenza?
[Bangogo sambu na kubenda dikebi ya kele na lutiti 6]
Keti Nzambi kezolaka nde beto sambila yandi sambu na boma ya kubaka ndola?
[Bangogo ya kemonisa kisina ya foto ya kele na lutiti 6]
Engravings by Doré
