3 Leza Kadipo na Lusa Lelo I bya Bine?
3 Leza Kadipo na Lusa Lelo I bya Bine?
Byokodi padi mwivwane: “Leza utalanga kabubi konso ka muntu ne kumupa mfuto na kumwela mu mudilo wa nyeke.”
“Leza upanga babi mfuto kupityila ku bimpengele bya kipangila.”
Bifundija Bible: Mukanda wa bubidi wa Petelo 3:9 unena amba, Yehova “kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” Pa kyaba kya kwimanina’nka pa bilubo byetu, aye utalanga biyampe byotulonga. “Meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.”—2 Bilongwa 16:9.
Kalunganyembo ka mudilo ke lufundijopo lwa mu Bible—mulangwe’tu bidi wa kususula nyeke muntu mu mudilo i wa munyanji kudi Leza. Mfuto ya mfulo yabwanya kupa mubi i ya lufu kete. (Yelemia 7:31; Loma 6:7) Bimpengele bya kipangila, byonakanyaonakanya byonso, kebitambangapo kudi Leza, ino i bitatyi byampikwa kulaya bifikila bonso.—Musapudi 9:11.
Kuyuka bubinebine mokubwaninya kukukwasha: Tukokeja kufwena mpata Leza kitatyi kyotuyuka amba udi na “mutyima wa lubilo wa kulekela” ne amba katopekangapo bukidibukidi. (Mitōto 86:5) Tufwaninwe kwingidila Leza pampikwa kwitopeka nansha moyo wa kupebwa mfuto. Ino, tubwanya kushimatyija lwitabijo lwetu pa kyalwilo kiyampe—ke pa buswe bwa kuswa Yehova kadi. Buno buswe budi pamo bwa bukomo bwa peulu bwitutonona twielele’ko kulonga bintu bimusangaja.—Mateo 22:36-38; 1 Yoano 5:3.
Nansha shi Leza usaka muntu ense alonge biyampe, ino uyukile amba bavule kebakalongapo namino. Shi aleke kulonga’po kintu pa boba basumininwe’nka kulonga bibi, nabya ukekala bwa mulopwe utūdile bijila kwampikwa kwibikomeneja, ulengeja bukondame ne masusu bivudile’ko. (Musapudi 8:11) Kuyuka kotuyukile amba Leza kakalekapo bubi bwikale’ko nyeke kwitupanga lukulupilo lwa bine lwa mafuku āya kumeso. Leza i mulaye kufundula’ko boba bendelela kulonga bibi, amba “bakikōkeji” bamone būmi bwa nyeke pano pa ntanda, monka mwaādi usakila tamba ku ngalwilo.—Mitōto 37:10, 11, 29. *
[Kunshi kwa dyani]
^ Pa kuyukila’ko myanda ya mukalamwina Leza ino ntanda ke paladisa, tala shapita 3 ne 8 wa dibuku Lelo I Bika Bine Bifundija Bible?
[Bushintuludi pa paje 6]
Le Leza usakanga tumutōte mwanda wa kutyina mfuto?
[Kutambile Kifwatulo pa paje 6]
Engravings by Doré
