3 E Tauimasui le Atua—Pe e Moni?
3 E Tauimasui le Atua—Pe e Moni?
Aʻoaʻoga atonu na e faalogo i ai: “E manatua pea e le Atua agasala uma ma tauia tagata i le faasalaga e faavavau i le afi i Seoli.”
“E faasalaina tagata agasala e le Atua e ala i mala faalenatura.”
Le aʻoaʻoga a le Tusi Paia: Ua faapea mai le 2 Peteru 3:9: “E lē finagalo [Ieova] e faaumatia se tasi, ae e finagalo ia oo uma lava i le salamō.” E na te mātauina o tatou uiga lelei, nai lo o o tatou sesē. O loo “silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.”—2 Nofoaiga a Tupu 16:9.
O le afi i seoli e lē o se aʻoaʻoga a le Tusi Paia—o le talitonuga o le faapuapuagatia e faavavau, o se manatu e matuā inosia e le Atua. O le oti, o lana faasalaga sili lea mo tagata leaga. (Ieremia 7:31; Roma 6:7) E lē faapogaia e le Atua mala faalenatura lea e faaumatia ma faaleagaina so o se mea, peitaʻi e aafia tagata uma ona o mea e tutupu faafuaseʻi.—Failauga 9:11.
Aogā o le iloaina o aʻoaʻoga moni: E mafai ona tatou mafuta vavalalata atu i le Atua pe a tatou iloa “e nofosauni [o ia] e faamagalo,” ma e lē vave ona ia taʻusalaina le tagata. (Salamo 86:5) E lē tatau ona tatou auauna i le Atua ona o faalogona nofosala po o le fefe i faasalaga. Peitaʻi, e mafai ona faamalosia lo tatou faatuatua i le uunaʻiga sili, o le alofa lea mo Ieova. O lenā alofa e maua ai le malosi e faalaeiauina i tatou, ina ia faia le mea sili e faafiafiaina ai o Ia.—Mataio 22:36-38; 1 Ioane 5:3.
E ui lava e finagalo le Atua ina ia fulitua tagata i le leaga, ae e na te silafia e lē mananaʻo le toʻatele e faia faapea. Pe ana lē gaoioi o ia e taofia ē e maumauaʻi e faia mea leaga, semanū e leai lava se eseesega o ia mai i se pule e faia tulafono ae e lē faamalosia, ma faatupulaʻia ai pea faiga lē tonu ma puapuaga. (Failauga 8:11) O lo tatou iloaina o le a lē onosaʻi mai pea le Atua i amioga leaga, o le a faamalosia ai lo tatou faamoemoe mo le lumanaʻi. Ua folafola mai e le Atua o le a aveesea ē e faia pea mea leaga, ina ia mafai ai ona olioli “ē e agamalu” i le ola e faavavau, e pei ona ia finagalo ai i le amataga.—Salamo 37:10, 11, 29. *
[Faaopoopoga i lalo]
^ pala. 7 Ina ia iloa atili e uiga i le auala o le a faia ai e le Atua le lalolagi ma parataiso, tagaʻi i le mataupu e 3 ma le 8 o le tusi O ā Aʻoaʻoga Moni a le Tusi Paia?
[Ata i le itulau 6]
Pe e finagalo le Atua e tatou te tapuaʻi atu iā te ia ona o le fefe i faasalaga?
[Ata i le itulau 6]
Engravings by Doré
