3 Gado de nomonomo fu strafu sma​—A sani dati tru?

Kande yu yere sma e taki: „Gado e luku ibriwan fu den sondu di wi e du èn a e bron sma fu têgo na ini hel.”

„Gado e meki rampu pasa fu strafu sma di e du sondu.”

San Bijbel e leri wi: Tu Petrus 3:9 e taki dati Yehovah ’no wani taki nowan sma lasi libi, ma taki ala sma musu kisi na okasi fu sori berow’. Gado no e tan luku den fowtu fu wi, ma na presi fu dati, a e poti prakseri na den bun fasi fu wi. Bijbel e taki dati „den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati”.​—2 Kroniki 16:9.

Bijbel no e leri wi taki sma e bron na ini hel. Fu taki en leti, Gado no e prakseri srefi fu meki sma nyan pina fu têgo. A moro bigi strafu di a kan gi den ogri sma, na fu tyari wan kaba kon na a libi fu den (Yeremia 7:31; Romesma 6:7). Boiti dati, a no Gado e meki den rampu pasa di e kiri bun sma nanga ogri sma. Na presi fu dati, sani di wi no e fruwakti e miti wi alamala.​—Preikiman 9:11.

A wini di a abi te yu sabi san tru: Wi kan kon moro krosibei na Gado te wi e frustan taki a „de klariklari fu gi sma pardon” èn taki a no de gaw fu strafu den (Psalm 86:5). Wi no musu dini Gado fu di wi konsensi e fon wi fu wan sani di wi du, noso fu di wi e frede taki a o strafu wi. Na presi fu dati, a moro bun sani di kan tranga a bribi fu wi, na te wi lobi Yehovah. Na a lobi dati e gi wi deki-ati fu du ala san wi man fu plisi en.​—Mateyus 22:36-38; 1 Yohanes 5:3.

A tru taki Gado wani taki ibri sma musu du bun, ma a sabi taki son sma no o du dati noiti. Efu a no ben o strafu den wan di de nomonomo fu du ogri, dan a ben o de leki wan tiriman di e meki wèt sondro fu strafu sma te den e pasa den wèt dati. Disi ben o meki taki noiti wan kaba ben o kon na ogridu nanga pina (Preikiman 8:11). Fu di wi sabi taki Gado no o gi pasi taki ogridu de fu ala ten, meki wi abi wan moi howpu gi a ten di e kon. Gado pramisi wi taki a o tyari wan kaba kon na den wan di e tan du ogri, so taki „den safri-ati sma” kan libi fu têgo na grontapu, soleki fa a ben wani dati na a bigin.​—Psalm 37:10, 11, 29. *

[Futuwortu]

[Prenspari pisi na tapu bladzijde 6]

Gado ben o wani taki wi anbegi en fu di wi frede fu kisi strafu?

[Sma di abi a reti fu a prenki na tapu bladzijde 6]

Engravings by Doré