3 Xikwembu Xa Rihisela—Xana I Ntiyiso?
3 Xikwembu Xa Rihisela—Xana I Ntiyiso?
Leswi u nga ha vaka u swi twile: “Xikwembu xi landzelela xidyoho xin’wana ni xin’wana naswona xi rihisela vanhu hi ku va xupula endzilweni wa tihele hilaha ku nga heriki.”
“Xikwembu xi xupula vadyohi hi timhangu ta ntumbuluko.”
Leswi Bibele yi swi dyondzisaka: Petro wa Vumbirhi 3:9 yi vula leswaku Yehovha, “a nga naveli leswaku ku lova ni un’we kambe u navela leswaku hinkwenu [hi] hundzuka.” Ematshan’weni yo dzika eka swihoxo swa hina, u languta leswinene eka hina. ‘Mahlo ya Xikwembu ma famba-famba emisaveni hinkwayo leswaku xi kombisa ntamu wa xona eka lava mbilu ya vona yi hetisekeke eka xona.’—2 Tikronika 16:9.
Ndzilo wa tihele a hi dyondzo ya Bibele—mhaka leyi ya ku xanisiwa hilaha ku nga heriki i nchumu lowu nyenyetsaka eka Xikwembu. Xi ta xupula vanhu lavo biha hi ku va herisa. (Yeremiya 7:31; Varhoma 6:7) Timhangu ta ntumbuluko, leti dlayaka vanhu swi nga languteriwanga, a ti vangiwi hi Xikwembu kambe i swiendlakalo leswi nga languteriwangiki leswi nga welaka un’wana ni un’wana.—Eklesiasta 9:11.
Ndlela leyi ku tiva ntiyiso swi nga ku pfunaka ha yona: Hi nga tshinela eka Xikwembu loko hi xiya leswaku xi “lunghekele ku rivalela” naswona a xi hatliseli ku avanyisa. (Pisalema 86:5) A hi lavi ku gandzela Xikwembu hi ri karhi hi titwa nandzu kumbe ku chava ku xupuriwa. Ematshan’weni ya sweswo, hi nga va ni ripfumelo eka Yehovha hikwalaho ka leswi hi n’wi rhandzaka. Rirhandzu ro tano ri hi susumetela ku endla leswi nga ematimbeni ya hina leswaku hi n’wi tsakisa.—Matewu 22:36-38; 1 Yohane 5:3.
Hambileswi Xikwembu xi lavaka leswaku un’wana ni un’wana a endla leswinene, xa swi tiva leswaku vo tala a va nge swi endli sweswo. Loko xi nga teki goza eka vanhu lava tiyimiseleke ku endla swilo swo biha, a ku nge vi ni ku hambana exikarhi ka xona ni vafumi lava vekaka milawu leswaku yi landzeleriwa, va pfumelela vuhomboloki ni ku xaniseka hilaha ku nga heriki. (Eklesiasta 8:11) Ku tiva ka hina leswaku Xikwembu xi nge pfumeleli vubihi hilaha ku nga heriki swi hi nyika ntshembo lowu tiyeke hi vumundzuku. Xi tshembise ku herisa lava hambetaka va endla swilo swo biha, leswaku “lavo rhula” va tiphina hi vutomi lebyi nga heriki laha misaveni hilaha a xi kunguhate hakona eku sunguleni.—Pisalema 37:10, 11, 29. *
[Nhlamuselo ya le hansi]
^ par. 7 Leswaku u kuma rungula leri engetelekeke malunghana ni ndlela leyi Xikwembu xi nga ta endla misava yi va paradeyisi ha yona, vona ndzima 3 na 8 ta buku leyi nge Xana Bibele Yi Dyondzisa Yini Hakunene?
[Marito lama tshahiweke exihlokweni lama nga eka tluka 6]
Xana Xikwembu xi lava leswaku hi xi gandzela hileswi hi chavaka ku xupuriwa?
[Laha Xifaniso Xi Humaka Kona eka tluka 6]
Engravings by Doré
