3 E haamanaˈo noa te Atua i te hara—E parau mau anei?

Ua faaroo paha oe: “E tapaopao te Atua i te mau hara atoa e e haamauiui noa oia i te taata i roto i te po auahi.”

“Te mau ati natura, e faautuaraa ïa na te Atua i te taata ino.”

Te haapii ra te Bibilia: Eita roa Iehova e ‘hinaaro ia pohe te hoê, ia noaa paatoa râ te tatarahapa,’ ia au i te Petero 2, 3:9. Eita oia e haamanaˈo noa i te ino ta tatou i rave, i te maitai râ. “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.”—Paraleipomeno 2, 16:9.

Aita te Bibilia e haapii ra e e haamauiui noa te Atua i te taata i roto i te po auahi. (Ieremia 7:31) Ia faautua oia i te taata ino, o te pohe ïa. (Roma 6:7) E ia tupu te mau ati natura o te vavahi i te mau mea atoa e o te haapohe i te taata, e ere na te Atua. E tupuraa manaˈo-ore-hia râ.—Koheleta 9:11.

Faufaaraa ia ite i te parau mau: Ia taa ia tatou e eita te Atua e ru i te faautua, e ‘tia râ ia ˈna ia faaore i te hara,’ e piri atu â tatou ia ˈna. (Salamo 86:5) Eiaha tatou e tavini ia Iehova no te manaˈo faahapa aore ra no te mehameha i te faautuaraa, no to tatou râ here ia ˈna. E tiaturi atu â ïa tatou ia ˈna, a tutava maite atu ai i te faaoaoa ia ˈna.—Mataio 22:36-38; Ioane 1, 5:3.

Te hinaaro ra iho â te Atua ia rave te taata atoa i te maitai. Ua ite râ oia e mea rahi o te ore e na reira. Eita râ oia e vaiiho noa i te feia tei opua e rave i te ino. Mea taa ê te Atua i te hoê taata faatere o te haamau i te mau ture, a vaiiho noa ˈi i te mau ohipa tia ore e te mauiui ia uˈana mai, ma te ore e faautua i te feia ino. (Koheleta 8:11) Ua tohu Iehova e e haamou oia i te feia ino tatarahapa ore, ia nehenehe “te feia mǎrû” e ora e a muri noa ˈtu i te fenua mai ta ˈna i opua na. E tiaturiraa papu ïa to tatou no a muri aˈe.—Salamo 37:10, 11, 29. *

[Nota i raro i te api]

[Parau iti faaôhia i te api 6]

E hinaaro anei te Atua ia haamori tatou ia ˈna no te mehameha i te faautuaraa?

[Faaiteraa i te fatu o te hohoˈa i te api 6]

Hohoˈa a Doré