4 God i Mekem i Gud Long Sam Man Nomo—?Hemia i Tru?

?Yu yu harem tok ya finis?: “God i rulum wol, mo evri samting we i hapen long wol ya i folem plan blong God. Wol i fulap long ol rabis fasin we man i mekem long narafala, taswe ating God nao i wantem olsem.”

?Baebol i tijim wanem?: I no God we i stamba blong ol rabis fasin we ol man oli mekem long ol narafala man. Baebol i tokbaot ol fasin blong Jehova i se: “Fasin blong [God] i gud tumas, mo hem i stret olwe nomo. . . . Oltaem hem i stap mekem ol samting we i stret, mo i stap mekem sem mak nomo long olgeta man.”—Dutronome 32:4.

God i givim samting long olgeta man, wetem ol man nogud tu, long gladhat blong hem. God i soemaot fasin ya taem “hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:45) God i mekem i stret long olgeta man, nomata wanem kala blong skin no kantri blong olgeta. Ol Wok 10:34, 35 i soemaot samting ya se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”

?Ale, wanem nao stamba blong ol rabis fasin ya? Plante man oli mekem i no stret long narafala man from we olgeta nomo oli jus blong mekem olsem. Oli no folem gudfala fasin blong God. (Dutronome 32:5) Mo tu, Baebol i soemaot we God i letem enemi blong hem, Setan, i rulum wol ya. * (1 Jon 5:19) Be i no longtaem, bambae God i mas finisim rul blong Setan we i mekem i no stret long ol man. Yes, God i mekemrere wan rod finis blong “brekemdaon ol wok we Setan i mekem.”—1 Jon 3:8.

?Trutok ya i save givhan long yu olsem wanem?: Ol nius blong ol nogud fasin we man i mekem long narafala man, oli stap kam plante moa, mo maet yu no kasem save from wanem i olsem. Taem yu save wanem nao stamba blong ol rabis fasin, samting ya i save givhan long yu blong kasem save from wanem ol fasin nogud oli kam antap, mo from wanem ol man oli no naf blong mekem wol ya i kam wan gudfala ples, nating se oli traehad. (Ol Sam 146:3) Sipos yu trastem ol promes blong God bambae yu save putum tingting blong yu i stap long wan gudfala fiuja. Bambae yu no westem taem mo paoa blong yu blong traem jenisim wol ya. Ol jenis ya oli blong smoltaem nomo mo oli no save mekem wol i kam gud fulwan.—Revelesen 21:3, 4.

Taem yu save wanem nao i stamba blong ol rabis fasin, samting ya i save givhan bigwan long yu taem trabol i kasem ples blong yu no famle blong yu. Taem wan man i mekem i no stret long yumi, maet yumi harem nogud olsem Habakuk. Habakuk i wan man blong wok blong God. Hem i krae long God se: “Long kot, ol jaj oli no moa stap folem loa, nao loa i no moa gat paoa.” (Habakuk 1:4) God i no kros long Habakuk from tok we hem i talem. Be God i leftemap tingting blong Habakuk taem hem i talem se hem i putum wan dei finis blong stretem ol trabol ya. Mo hem i givhan long Habakuk blong i harem gud bakegen nating se hem i stap long trabol taem. (Habakuk 2:2-4; 3:17, 18) Olsem Habakuk, yumi stap long wol we i nogud, be yumi save gat tingting we i kwaet mo yumi gat pis. Hemia from we yumi trastem ol promes blong God se wan dei bambae hem i finisim fasin ya we man i stap mekem i no stret long narafala man.

[Futnot]

[Tok blong makem poen long pej 7]

?God nao i mekem we ol man oli safa?

[Foto Credit Line long pej 7]

© Sven Torfinn/Panos Pictures