4 Ang Diyos Dili-Makiangayon—Tinuod ba Kana?

Ang imo tingaling nadunggan: “Ang Diyos maoy nagmando niining kalibotana, ug pagbuot niya ang tanang panghitabo. Sanglit ang kalibotan puno sa diskriminasyon, inhustisya, ug pagdaogdaog, ang Diyos gayoy responsable niana.”

Ang gitudlo sa Bibliya: Ang Diyos dili mao ang hinungdan sa inhustisya. Sa paghubit kang Jehova, ang Bibliya nag-ingon: “Hingpit ang iyang kalihokan, kay ang tanan niyang dalan hustisya.”—Deuteronomio 32:4.

Ang Diyos mahinatagon sa tanan, lakip niadtong daw dili takos niana. Pananglitan, ‘siya nagapasubang sa iyang adlaw diha sa mga tawong daotan ug sa mga maayo ug nagapaulan diha sa mga tawong matarong ug sa mga dili-matarong.’ (Mateo 5:45) Wala siyay gipihig nga rasa ug kultura, ingon sa gipakita sa Buhat 10:34, 35: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”

Nan, unsay hinungdan sa inhustisya? Daghan karon ang naghimog inhustisya, nga wala magsunod sa ehemplo sa Diyos. (Deuteronomio 32:5) Gipakita usab sa Bibliya nga gitugotan sa Diyos ang iyang kaaway, ang Yawa, sa pagkontrolar sa kalibotan. * (1 Juan 5:19) Apan sa dili madugay taposon sa Diyos kining dili-makiangayong pagmando. Nakahimo na siyag mga lakang sa “pagbungkag sa mga buhat sa Yawa.”—1 Juan 3:8.

Kon sa unsang paagi ang pagkahibalo sa kamatuoran makatabang nimo: Tingali ikaw nabalaka sa daw way-kataposang balita bahin sa korapsiyon, pagdaogdaog, ug inhustisya. Ang pagkahibalo sa hinungdan niini motabang nimo sa pagsabot kon nganong daotan kaayo ang kahimtang, ug kon nganong ang paningkamot sa tawo nga moarang-arang ang kalibotan kanunayng pakyas. (Salmo 146:3) Inay ihurot ang panahon ug kusog sa paghimog temporaryong mga kausaban, ikaw makasalig sa usa ka maayong kaugmaon nga gisaad sa Diyos.—Pinadayag 21:3, 4.

Ang pagkasayod sa tinuod nga hinungdan sa inhustisya ilabinang makatabang nato sa dihang makaagom ug kalisdanan. Kon kita himoag inhustisya, kita makatuaw sama sa alagad sa Diyos nga si Habacuc: “Ang balaod nawad-an sa gahom, ug ang hustisya wala mogula.” (Habacuc 1:4) Wala badlonga sa Diyos si Habacuc sa pagsulti niini. Hinunoa, Iyang gipasaligan ang Iyang alagad nga Siya nagtakdag panahon nga tul-iron ang mga butang ug gitabangan si Habacuc nga magmalipayon bisan sa kalisdanan. (Habacuc 2:2-4; 3:17, 18) Sa susama, ang pagsalig sa saad sa Diyos nga tul-iron ang inhustisya makatabang nimo nga magmalinawon bisan niining dili-makiangayong kalibotan.

[Footnote]

[Blurb sa panid 7]

Ang Diyos ba gayoy responsable sa pag-antos ug inhustisya?

[Picture Credit Line sa panid 7]

© Sven Torfinn/Panos Pictures