4 Kot, Emön Mi Pwüngüngaw​—Itä Mi Pwüng Ena?

Eli, iei met ka fen rongorong: “Kot i sou nemenemen ei fönüfan, me fän letipan meinisin minne a fiffis. Pokiten ei fönüfan a ur ren pwüngüngaw, aapaap, me kirikiringaw, iwe, ese mwääl Kot a efisatä ekkeei mettoch.”

Ifa äitien ewe Paipel: Kot ese efisatä ekkewe pwüngüngaw ra fiffis woon ei fönüfan. Iei met ewe Paipel a äweweei usun Jiowa: “An föför ra unusen mürina, pun an kewe al meinisin ra pwüng.”​—Tuteronomi 32:4.

Kot a kirekiröch ngeni aramas meinisin, kapachelong chokkewe rese äfänni i. Äwewe chök, “a atötai förian akar won ekewe aramasangau me aramasöch, nge a apüngatiu üt won chon pwüng me chon pwüngingau.” (Mattu 5:45) Fofor 10:34, 35 a äiti ngenikich pwe a pwüng an föfför ngeni aramas meinisin, a apasa: “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”

Iwe, met chök a efisatä pwüngüngaw? Chommong aramas ra eäni föfför ese pwüng nge rese äppirü än Jiowa föfför mi pwüng. (Tuteronomi 32:5) Ewe Paipel a pwal pwäratä pwe Kot a mut ngeni ewe Tefil, ewe chon oputa, an epwe nemeni fönüfan. * (1 Jon 5:19) Iwe nge, ekiselo chök Kot epwele aükatiw ena nemenem ese pwüng. A fen mmolnetä an “epwe atala än Tefil angang.”​—1 Jon 3:8.

Om silei ewe enlet epwe älisuk: Neman, ka fokkun osukosuk ren om kükküna are rongorong ekkewe pworaus usun än aramas aapaap, kirikiringaw me pwüngüngaw. Om silei iö a efisi ekkena mettoch epwe älisuk le weweiti pwata ei otot a fokkun ngaw me pwata a chök sosopwongaw än aramas angangen amürinnölo ei fönüfan. (Kölfel 146:3) Ika kopwe lükülük woon än Kot kewe pwon lap seni om awora fansoun me pöchökkül le achocho ngeni ekkewe mettoch resap nomottam, iwe, epwe wor om äpilükülüköch fän iten mwach kkan.​—Pwarata 21:3, 4.

Ach weweiti wesewesen ewe popun a fiffis pwüngüngaw, epwe fokkun älisikich atun sipwe pwisin küna riäfföü. Ika emön a kirikiringaw ngenikich, eli aloch epwe pwal chou usun alon nöün Kot we chon angang Apakuk, a apasa: “Allük a apwangapwangala, nge pwüngüöch esap pwönüetä.” (Apakuk 1:4) Kot ese apwüngü Apakuk ren met a apasa. Nge a alükülükü ren an ereni pwe a fen aotalo eü fansoun an epwe amoielo minne mi ngaw me a älisi Apakuk an epwe küna pwapwa lon ewe fansoun mi weires. (Apakuk 2:2-4; 3:17, 18) Pwal ina usun, ach lükülük woon än Kot pwon le pwäkini minne mi ngaw epwe tongeni älisikich le meefi kinamwe me nükünüköch lon ei otot mi pwüngüngaw.

[Pwóróus fan]

[Ekis Pwóróus lón pekin taropwe 7]

Itä Kot a wesewesen efisi riäfföü me pwüngüngaw?

[Credit Line lon pekin taropwe 7]

© Sven Torfinn/Panos Pictures