4 Bondye i enzis​—Eski i vre?

Sa ki petet ou’n tande: “Bondye ki pe diriz sa lemonn e tou sa ki arive i son lavolonte. Lemonn i ranpli avek diskriminasyon, lenzistis ek labi, Bondye i bezwen responsab.”

Ki Labib i dir: Pa Bondye ki responsab pour sa bann lenzistis dan lemonn. La sa ki Labib i dir lo Zeova: “Sa Ros, tou sa ki i fer i parfe, parski tou son bann semen i lazistis.”​—Deterononm 32:4.

Bondye i zenere anver tou dimoun, enkli sa bann ki kapab paret pa merite. Par egzanp, “i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:45) I tret bann dimoun sorti dan tou ras ek kiltir dan en fason zis, parey Akt 10:34, 35 i montre: “Bondye pa fer preferans pour personn. Me dan nenport ki nasyon tou dimoun ki annan respe pour li e ki fer sa ki byen Bondye i kontan li.”

Be savedir lekel ki responsab sa bann lenzistis? Bokou dimoun pa kontan sa ki byen parey Bondye e zot volonterman fer sa ki mal. (Deterononm 32:5) Deplis, Labib i montre ki Bondye pe les son lennmi Dyab egzers son lotorite lo lemonn. * (1 Zan 5:19) Par kont, Bondye pou byento met en lafen avek sa dominasyon enzis. I’n deza fini prevwar en mwayen ki i pou servi pour “detri bann travay dyab.”​—1 Zan 3:8.

Konn laverite i kapab ed ou: Petet ou vreman enkyet akoz sa kantite koripsyon, labi ek lenzistis ki pa zanmen fini. Si ou konn lakoz sa bann problenm, ou pou pli byen konpran akoz kondisyon lemonn i sitan terib koumsa. Ou pou osi konpran akoz ki malgre bann imen pe fer bokou zefor pour esey amelyor sityasyon lemonn, zot plan i toultan tonm dan delo. (Psonm 146:3) Olye depans ou letan ek lenerzi pour fer bann sanzman ki pou zis tanporer, ou pou kapab annan en lespwar pour lavenir ki baze lo en konfyans total dan promes Bondye.​—Revelasyon 21:3, 4.

Si nou konpran lekel ki vreman responsab pour sa bann lenzistis, sa pou ed nou vreman kan nou pou personnelman eksperyans bann difikilte. Kan nou ganny trete dan en fason enzis, petet nou kapab kriye parey Abakouk, en serviter Bondye ki ti dir: “Lalwa i paralize e zanmen i annan lazistis.” (Abakouk 1:4) Bondye pa ti reprimann Abakouk akoz i ti dir sa. O kontrer, Bondye ti reasir Son serviter ki I ti’n fikse en letan pour regle sa problenm e i ti ed Abakouk pour zwaye menm si i ti pe eksperyans bann difikilte. (Abakouk 2:2-4; 3:17, 18) Pareyman, si nou annan konfyans dan sa promes ki Bondye pou retir tou bann lenzistis, nou pou santi nou soulaze e nou pou annan lape lespri menm dan en lemonn enzis.

[Not anba lo paz]

[Ekstre lo paz 7]

Eski Bondye ki vreman responsab soufrans ek lenzistis?

[Portre sorti kot lo paz 7]

© Sven Torfinn/Panos Pictures