4 Nzambi Mukua Kisueia o Kuila Kidi?

Ihi i uene mu kuívua: “Nzambi muene ua mu tumina o mundu iú, o ima ioso ia mu bhita ku mundu, ia mu bhita muene mu vondadi iê. Mukonda o mundu uezala ni ima ia iibha, ku kamba ufundisu, ni kathombo, Nzambi muéne uala ni kikuma ku ima íii.”

Ihi i longa o Bibidia: Nzambi ki muéne uala ni kikuma ku ima ioso ia iibha iene ku mundu. O Bibidia izuela ia lungu ni Jihova: “O uendelu uê uoso uatetuluka; Nzambi muene o Kidi, o mua muene ki muene mangonha.”—Matendelelu 32:4.

Nzambi uene mu bhanga mbote ku athu oso, kate muene ni kua ió kene mu bhanga o vondadi iê. Mu kifika, “muène mukua kubhangesa dikumbi diê di bandela athu abhukumuka ni athu ambote, u tumikisa mvula ni kua ia aiuka ni ku ísueia.” (Matesu 5:45) Muéne u bhanga kiambote ku athu oso, kála kilondekesa o divulu dia Ikalakalu 10:34, 35, kiambe: “Kuma Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”

Kienhiki, nanhi uala ni kikuma ku ima ioso ia iibha iene ku mundu? Athu avulu a sola ku bhanga o ima ia iibha, ka kaiela o phangu iambote ia kufundisa kua Nzambi. (Matendelelu 32:5) O Bibidia ilondekesa ué kuma Nzambi ua mu kuehela o nguma iê, Diabhu ku tumina o mundu. * (1 Nzuá 5:19) Maji kua kambe ngó bhofele, Nzambi ua-nda buika o sobha ia mu tumina o mundu iú. Muéne ua xindi o thembu phala ku ‘muanga o ikalakalu iene mu bhanga Diabhu.’—1 Nzuá 3:8.

Kiebhi o kuijiia o kidi ki ku kuatekesa: U tena ku diuana mu ku mona o ima ioso ia iibha, ni ku kamba o ufundisu ua kidi ku mundu iú. O kuijiia se mukonda diahi kuene hadi iavulu, ku tena ku ku kuatekesa kuijiia se mukonda diahi kuene kuiibha ku mundu, ni mukonda diahi o athu kene mu tena ku batula o maka enhá. (Jisálamu 146:3) Mu veji dia ku ngastala thembu iavulu, ni nguzu phala ku lungulula o muenhu, eie u tena ku kala ni kidielelu mu ku dielela ku ikanenu ia Nzambi.—Dijingunuinu 21:3, 4.

O kuijiia se mukonda diahi kuene kuiibha ku mundu, ku tena ku ku kuatekesa, bhenge-bhenge kioso ki u bhita mu íii. Kioso kia tu bhanga kia iibha nange tu zuela ué kála kia zuela o selevende ia Nzambi, Habakuke, kioso kiambe: “Kitumu kia zondo, o ku batula mu kidi ki kua moneka.” (Habakuke 1:4) Nzambi ka kaxtikala Habakuke mu kuzuela kiki. Mu veji dia kiki, Nzambi ua kuatekesa o selevende iê kuijiia kuma muéne ua xindile kiá o thembu phala ku batula o maka, iu ua kuatekesa Habakuke ku sanguluka mu ibhidi ia kexile mu bhita na-iu. (Habakuke 2:2-4; 3:17, 18) Kiene kimoxi ué, o ku dielela mu ikanenu ia Nzambi ia ku zubha o kuiibha, ku tena ku ku kuatekesa ku kala ni kutululuka ku mundu iú ua iibha.

[Tanga mu luji]

[Kilombuelelu ku bandu 7]

O kuila Nzambi muéne uala ni kikuma ku ima ioso ia iibha iene ku mundu?

[Mixinda ia tokala ku foto 7]

© Sven Torfinn/​Panos Pictures