4 Pathianin Hleih A Nei—Hei Hi A Dik Em?

I lo hriat tawh mai theih chu: “Pathian hi he khawvêl chunga thuneitu a ni a, a chhûnga thilthleng engkim hi a duhzâwng anga thleng a ni. Khawvêl hi hleih neihna te, rorêl dik lohna te, leh inawp behna tea a khah tlat avângin, Pathian chu a awmtîrtu a ni ngei ang.”

Bible zirtîrna chu: Khawvêla rorêl dik lohnate hi Pathian awmtîr a ni lo. Jehova chungchângah Bible chuan: “A thiltih a fel famkim; a awm dân zawng zawng chu dân a ni,” tiin a sawi.—Deuteronomy 32:4.

Pathian chu phu lo anga langte pawh tiamin mi zawng zawng chungah a thilphal hle a. Entîr nân, “mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn a ni.” (Matthaia 5:45) Tirhkohte 10:34, 35-a târ lan: “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tih nêna inremin, hnam tin chi tinte chu angkhat vekin a cheibâwl ṭhîn a ni.

Chuti chu, hleih neihna lo chhuahna bul ber chu eng nge ni ta ang? Mi tam tak chuan rorêl dikna kawnga Pathian entawn tûr siam chu zui lovin, hleih nei taka thiltih chu an thlang a. (Deuteronomy 32:5) Tin, Bible chuan Pathianin a hmêlma, Diabola chu khawvêl chunga thu a neih a phal tih a târ lang bawk. * (1 Johana 5:19) Amaherawhchu, dik lo taka rorêl a phal hun chhûng chu a tâwp thuai dâwn. ‘Diabola hnathawhte a tihboral theihna’ tûr chu a lo ruahman diam tawh a ni.—1 Johana 3:8.

Thutak hriatnain a ṭanpui dân che: Tâwp thei lo tûr anga lang ei rûkna, inawp behna, leh rorêl dik lohna chanchinte chuan a ngaihna hre lovin a awmtîr che pawh a ni thei. Buaina lo chhuahna bul hriatna chuan tûn lai dinhmun a chhiat nasat chhan leh siam ṭhat tuma mihringte ṭan lâkna a hlawhchham fo nachhan hre thiam tûrin a ṭanpui che a ni. (Sâm 146:3) A hlawhtlin ber pawha rei lo tê chauh daih tûr inthlâk thlengna atâna hun leh tha leh zung sên ai chuan, Pathian thutiam rinnaa innghat nakin hun beiseina ṭha tak chu i nei thei a ni.—Thu Puan 21:3, 4.

Hleih neihna lo chhuahna dik tak hriatna chuan a bîk takin kan chhehvêla harsatna a lo thlen hunah min ṭanpui thei a ni. Hleih nei taka cheibâwl kan nih hian, Pathian chhiahhlawh Habakuka angin kan au chhuak ve mai thei a ni: “Dân thu chuan kori a tu hlei thei lo va, rorêlna [dik] a chhuak ngai hek lo,” tiin. (Habakuka 1:4) Pathian chuan Habakuka chu hetiang thu a chhâk chhuah avângin a hrem lo. A chhiahhlawh chu thil chinfel nâna hun ruat a neih thu hrilhin, harsatna tâwk chung pawha hlimna nei tûrin a ṭanpui zâwk mah a ni. (Habakuka 2:2-4; 3:17, 18) Chutiang bawkin, rorêl dik lohna siam ṭha tûra Pathian thutiam rinna chuan hleih neihna khawvêlah remna leh rilrua thlamuanna nei tûrin a ṭanpui thei che a ni. (w11-E 10/01)

[Footnote]

[Phêk 7-naa thu lâk chhuah]

Hrehawm tawrhna leh rorêl dik lohnate chungah Pathian chuan mawh a phur tak zet em?

[Phêk 7-naa Milem Hawhtîrtu]

© Sven Torfinn/Panos Pictures