4 Aliwan Patas so Dios​—Tua Kasi?

No antoy ibabaga ra: “Kontrolado na Dios iyan mundo tan linawa to so amin a nagagawa. Kanian diad sayan mundo ya napnoy diskriminasyon, ag-inkahustisya, tan panag-abuso, say Dios so natetel.”

No antoy ibabangat na Biblia: Aliwan say Dios so panlalapuan na ag-inkahustisya ed mundo. Oniay inkuan na Biblia nipaakar ed si Jehova: “Ayadyari so gawa to; ta kaptekan so saray amin a dalan to.”​—Deuteronomio 32:4.

Maiter so Dios ed amin, anggan diad saray agkomon makanepegan. Alimbawa, “papasinagen to so agew to ed saray mauges tan maong a totoo tan papepelagen to so uran ed saray matunong tan agmatunong.” (Mateo 5:45) Parehoy trato tod amin a totoo antokaman so poli tan kultura ra, a singa ipapanengneng na Gawa 10:34, 35: “Say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.”

Siopa sirin so panlalapuan na ag-inkahustisya? Pinili na dakel a totoo so magmaliw ya aliwan patas, agda inalig so inkahustisya na Dios. (Deuteronomio 32:5) Sakey ni, ibabaga na Biblia ya aabuloyan na Dios so kalaban to, say Diablo, ya manuley ed mundo. * (1 Juan 5:19) Balet, magano lan panganggaen na Dios itan a mauges ya pananguley. Sikatoy nanggawa na paraan “pian deralen to iray kimey na Diablo.”​—1 Juan 3:8.

No panon a makatulong ed sika so pangamtad katuaan: Nayarin naguguloy nonot mo ed agmanundan panagsaol, panag-abuso, tan ag-inkahustisya. Diad pangamtad lapuan na problema, natalosan mo no akin et mauge-uges so mundo tan no akin et siansian anggapoy nagawaan na too pian naparakep so situasyon. (Salmo 146:3) Imbes ya sayangen ni so oras tan sagpot pian manggawa na temporaryon pananguman, maabig no say panmatalkan mo et saray sipan na Dios ed arapen.​—Apocalipsis 21:3, 4.

Makatulong so pakaamta ed no siopan talagay panlalapuan na ag-inkahustisya, lalo la no sikatayon mismo so makaeksperiensya na kairapan. No walay nan-agrabyadod sikatayo, nayarin nibaga ti met so imbaga na lingkor na Dios a si Habacuc: “Maletey tan anggapoy kana so ganggan, tan agbalot natutumbok so katunongan [hustisya].” (Habacuc 1:4, Maung a Balita) Agnampasnokan na Dios si Habacuc sanen imbaga to itan. Imbes, impaseguro na Dios ed si Habacuc ya walay dugan panaon pian ipetek To so problema tan akatulong itan ed sikato pian magmaliw a maliket anggaman mairap so kipapasen. (Habacuc 2:2-4; 3:17, 18) Ontan met natan, no manmatalek tayod sipan na Dios ya ekalen to so ag-inkahustisya, nawalaan tayoy deen na nonot diad sayan aliwan patas a mundo.

[Paimano ed leksab]

[Blurb ed pahina 7]

Talaga kasin say Dios so panlalapuan na irap tan ag-inkahustisya?

[Picture Credit Line ed pahina 7]

© Sven Torfinn/Panos Pictures