4 A Dios a Diak el Melemalt​—Tia Ngklemerang?

A tekoi el bla mrenges: “Tia el beluulechad a longedereder er ngii a Dios, me a rokui el tekoi el duubech er a chelsel a meketmokl el oltirakl er a soal. A beluulechad a kmal mui er a omengetukel er a rechad, chelebirukel el omeruul, me a kltui el belkul a kmo a Dios a uchul aika el tekoi.”

Aike el lolisechakl a Biblia: A Dios a kmal diak el uchul a chelebirukel er a beluulechad. Me a Biblia a mesaod er a Jehovah el kmo: “Ng cherrungel e melemalt el ngar a rokui el rolel.”​—Duteronomi 32:4.

A Dios a kmal bekururau el mo er a rokui el chad, el uldimukl er tirke el diak el rredemelel a nguu tia el ungil el omerellel. El uai tiang, ‘ngongesechii a sils er bebrir ar mekngit mar ungil, e oleiit ra chull el morar melemalt mar diak le melemalt.’ (Matteus 5:45) Ngdirrek el melemalt a omerellel el mo er a rechad er a kakerous el beluu el tir a kakerous a siukang er tir, el ua losaod er ngii a Rellir 10:34, 35 el kmo: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”

Me a leuaisei, e ngngerang a uchetemel a chelebirukel el omeruul? A rebetok el chad a melilt el mo meruul a chelebirukel, e diak loltirakl er a kerebil a Dios el kirel a llemalt. (Duteronomi 32:5) Me a lmuut el tang, a Biblia a ochotii el kmo a Dios a mecherei ngike el cherrouel, el Diabelong, me ngmengedereder er a beluulechad. * (1 Johanes 5:19) Me nguaisei, engdi tia el omerellel a Dios el mecherei a mekngit me ngmelemolem a kmal di kmedu el mo nguemed. Ngmla oterekeklii a rolel e ngmo ‘melemall a urerel a Diabelong.’​—1 Johanes 3:8.

Sel rolel a klemerang a lengesukau: Nglocha mo rrau a rengum sel momes e morrenges a chisel aika el diak el mekimd el telemellir a rechad, odechelakl me a chelebirukel el omeruul. Sel bo modengelii a mera el uchul aika el tellemall, e ngngosukau el mo medengelii a uchul me a blekeradel er a klengar a kmal mekngit, me sel uchul me a rechad a melasem el meruul er tia el beluulechad el mo ungil e kmal diak el sebechir. (Psalm 146:3) A lsekum e kede ousbech a temed me a klisiched el melasem el meruul er a beluulechad el mo ungil, e ngkmal di tedeb, me ngbai lmuut el ungil a bo dotuil a klaumerang er kid er aike el mla moterekokl el telbilel a Dios el kirel a ngar er a medad el klebesei.​—Chocholt 21:3, 4.

Sel bo dodengelii a mera el uchul a chelebirukel e ngngosukid el mo outekangel er sel taem el leduubech a meringel el tekoi er a klengar er kid. Chouaika el taem, e ngsebechel el mo mekngit a rengud el ua mesiungel a Dios el Habakuk el dilu el kmo: “A llach a mechitechut e diak a ultutelel, ma llemalt a kmal diak le meruul.” (Habakuk 1:4) A Dios a dimlak loungeroel er ngii el kirel tiang, e ngbai milengelaod er ngii el kmo ngmla oterekeklii a taem el bo losmechokl a rokui el tekoi, e ngilsuir a Habakuk el mo dmeu a rengul er a taem el ngii a mle chelebangel a meringel el tekoi. (Habakuk 2:2-4; 3:17, 18) Me ngdi osisiu, a dotuil a klaumerang er kid er a telbilel a Dios el mo mesmechokl a rokui el tekoi, e ngngosukid el mo chelellakl a rengud e metik a budech er a chelsel tia el chebirukel el beluulechad.

[Footnote]

[Blurb el ngar er a 7 el llel]

A Dios ngmera el uchul a ringel me a chelebirukel?

[Credit Line]

© Sven Torfinn/​Panos Pictures