4 Dios nitlan likatsi. ¿Pi xlikana?

Makgapitsi wankgo: «Dios mapakgsi kakilhtamaku, chu putum tuku lay wa xtalakaskin. Anan tiku laksakpaxkinankgo, tlawakan tuku nitlan chu mapatininankan wa xkuenta Dios».

Wantuku masiya Biblia: Jehová ni wa tlawa tuku nitlan lama. Biblia wan pi: «Lu tlan putum tuku tlawanit, xlakata putum tuku tlawa xaʼakgstitum» (Deuteronomio 32:4).

Dios putum tlan kalikatsini, chu asta tiku ni kaminini nachuna kalikatsini. Akgtum liʼakxilhtit, Dios tlawa “nachichinan kxokgspunkan wa nti ni lakwan chixkuwin, chu wanti ntlan chixkuwin, chu na makaminikgoy sin, o sen wanti xatlan, chu wanti ni tlan xtayat” (Mateo 5:45). Na tlan kalikatsini tiku tanu tanu xcolorkan chu tanu tanu la kamakgastakanit chuna la wan Hechos 10:34, 35: «Dios, ni [laksakpaxkinan] [...]; wampi kaxani kawa xala, wanti mpikuaniy Dios, chu na wantu xlilat ntu ntlaway, tlan tlaway» o makgamakglhtinan.

Pero ¿tuku xlakata anan tuku nitlan? Pulaktum, lhuwa tiku ni chuna likatsikgo la Dios wata tlawakgo tuku ni akgstitum (Deuteronomio 32:5). Chu apulaktu, Biblia masiya pi mastama talakaskin ni makgas namapakgsinan Akgskgawini kkakilhtamaku, xtalamakgasitsin Dios (1 Juan 5:19). * Chu uma kakilhtamaku nialh makgas nasputa. Jehová lakkaxwilinita xlakata «namalakgsputuy xtatlaw akgskgawini» (1 Juan 3:8).

La makgtayayan nakatsiya tuku xaxlikana: Max lu lilipuwana akxni kgaxpata pi lhuwa tiku nitlan likatsikgo, kamapatinikgo amakgapitsin chu tiku ni tlawakgo tuku xaʼakgstitum. Pero akxni nakatsiya tuku xlakata anan taʼakglhuwit na nakatsiya tuku xlakata lu nitlan wi kakilhtamaku chu latamanin nila lakkaxtlawakgo (Salmo 146:3). Ni lhuwa kilhtamaku kalimaxtu nalakkaxtlawaputuna umakgolh taʼakglhuwit xlakata ni katimakgapalalh, wata kalipawanti pi tuku wanit Dios putum nakgantaxtu (Apocalipsis [Revelación] 21:3, 4).

Chu akxni kinkaʼakgspulayan tuku nitlan, lu tlan nakinkamamakgkatsiniyan akxni katsiyaw tuku xlakata anan tuku nitlan. Komo nitlan nakinkalikatsinikanan, max nachuna nawanaw la wa chatum kskujni Dios, Habacuc: «Ni makgantaxtikan limapakgsin, chu ni tlawakan tuku lakatitum» (Habacuc 1:4). Dios ni kilhnilh xlakata chuna wa. Wata wanilh pi xlakkaxwilinita kilhtamaku xlakata xlakkaxtlawalh tuku nitlan xlama chu makgtayalh xlakata xpaxuwalh maski xʼanan lhuwa taʼakglhuwit (Habacuc 2:2-4; 3:17, 18). Nachuna komo nalipawanaw pi Dios namasputu tuku nitlan chuna la wanit, namakgtayayan tlan nalatapaya chu lu tlan namakgkatsiya kʼuma lixkajni kakilhtamaku.

[Nota nema wi kpágina]

[Tuku wan página 7]

¿Pi wa Dios xkuenta xlakata anan tuku nitlan chu tapatin?

[Tiku tapakgsini fotografía xla página 7]

© Sven Torfinn/Panos Pictures