4 Xikwembu Xi Kala Vululami—Xana I Ntiyiso?

Leswi u nga ha vaka u swi twile: “Xikwembu xi ni vutihlamuleri bya misava leyi naswona nchumu wun’wana ni wun’wana lowu endlekaka wu endleka hi ku rhandza ka xona. Tanihi leswi misava yi taleke hi xihlawuhlawu, vuhomboloki ni ku tshikileriwa, Xikwembu xi fanele xi va ni vutihlamuleri.”

Leswi Bibele yi swi dyondzisaka: Xikwembu a hi xona xi vangaka vuhomboloki lebyi nga kona laha misaveni. Loko Bibele yi hlamusela Yehovha, yi ri: “Ntirho wakwe wu hetisekile, hikuva tindlela takwe hinkwato i vululami.”—Deteronoma 32:4.

Xikwembu xi ni musa eka vanhu hinkwavo, ku katsa ni lava wu nga va faneriki. Hi xikombiso, xi ‘tsuvukisa dyambu ra xona eka vanhu vo homboloka ni lavanene naswona xi nisa mpfula ya xona ehenhla ka vanhu lava lulameke ni lava nga lulamangiki.’ (Matewu 5:45) Xi khoma vanhu va tinxaka ni va mindhavuko hinkwayo hi vululami, hilaha Mintirho 10:34, 35 yi kombisaka hakona: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”

Kutani, xana i mani la vangaka vuhomboloki? Vanhu vo tala va hlawula ku endla leswi nga lulamangiki, handle ko landzela xikombiso xa Xikwembu xa vululami. (Deteronoma 32:5) Nakambe, Bibele yi kombisa leswaku Xikwembu xi pfumelela nala wa xona, ku nga Diyavulosi, leswaku a lawula misava. * (1 Yohane 5:19) Hambiswiritano, ku nga ri khale Xikwembu a xi nge he n’wi pfumeleli Diyavulosi leswaku a lawula misava. Xi lunghiselele ndlela yo “herisa mintirho ya Diyavulosi.”—1 Yohane 3:8.

Ndlela leyi ku tiva ntiyiso swi ku pfunaka ha yona: U nga ha pfilunganyiwa hi swiviko swa vukanganyisi leswi yaka swi nyanya, tihanyi ni ku kala vululami. Ku tiva lexi vangaka swiphiqo swi ku pfuna ku twisisa leswaku hikwalaho ka yini swiyimo swi bihe swinene ni leswaku ha yini matshalatshala lamakulu ya vanhu yo endla leswaku misava yi va ndhawu yo antswa ma hundzuke nyuku wa mbyana. (Pisalema 146:3) Ematshan’weni yo nyikela hi nkarhi ni matimba eku endleni ka ku cinca loku nga ta va ka xinkarhana, u nga ha va ni ntshembo lowu tiyeke wa vumundzuku lowu sekeriweke eka ku tshemba switshembiso swa Xikwembu.—Nhlavutelo 21:3, 4.

Ku twisisa lexi vangaka vuhomboloki swi nga hi pfuna ngopfu-ngopfu loko hi weriwa hi maxangu endyangwini. Loko hi khomiwa hi ndlela yo biha, hi nga ha rila ku fana ni nandza wa Xikwembu Habakuku loyi a nga te: “Nawu wu heleriwa hi matimba, vululami a byi vi kona.” (Habakuku 1:4) Xikwembu a xi n’wi xupulanga Habakuku hikuva a vule leswi. Ematshan’weni ya sweswo, Xikwembu xi tiyisekise nandza wa xona leswaku xi veke nkarhi wo lulamisa timhaka kutani xi n’wi pfuna ku kuma ntsako loko a langutane ni xiphiqo. (Habakuku 2:2-4; 3:17, 18) Hilaha ku fanaka, ku tshembela eka switshembiso swa Xikwembu swo herisa vubihi swi nga hi pfuna leswaku hi kuma ku rhula ka mianakanyo emisaveni leyi yo biha.

[Nhlamuselo ya le hansi]

[Marito lama tshahiweke exihlokweni lama nga eka tluka 7]

Xana Xikwembu hi xona xi vangaka ku xaniseka ni vubihi?

[Laha Xifaniso Xi Humaka Kona eka tluka 7]

© Sven Torfinn/Panos Pictures