4 Mea paetahi te Atua—E parau mau anei?

Ua faaroo paha oe: “O te Atua te faatere o teie nei ao e no to ˈna hinaaro e tupu ai te mau mea atoa. Mea hiˈo ino roa te taata te tahi i te tahi, ua rahi te ohipa tia ore e te haavîraa i te ao nei. O te Atua te tumu.”

Te haapii ra te Bibilia: E ere o te Atua te tumu o te mau ohipa tia ore i te ao nei. No nia ia Iehova, te parau ra te Deuteronomi 32:4: “Tei tia roa ta ˈna ohipa ra; o tei au atoa to ˈna ra mau haerea.”

Mea hamani maitai te Atua i te taata atoa, te na ô ra hoi te Mataio 5:45 e ‘te faahiti nei oia i to ˈna mahana i nia i te feia ino e te feia maitai, e te haamairi nei oia i te ûa i nia i te parau-tia e te parau-tia ore.’ E aupuru ïa oia i te taata no te mau nunaa atoa. Te haapapu ra te Ohipa 10:34, 35: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.”

O vai ïa te tumu o te ohipa tia ore? Mea rahi te taata aita e pee ra i te hiˈoraa parau-tia o te Atua. E ohipa tia ore anaˈe ta ratou. (Deuteronomi 32:5) Te faaite atoa ra te Bibilia e te faatia nei te Atua i to ˈna enemi, te Diabolo, ia mana i nia i teie nei ao. * (Ioane 1, 5:19) Eita râ te Atua e vaiiho noa i te faatereraa tia ore a te Diabolo. Ua faataa aˈena oia i ta ˈna ravea no te ‘haamou i te ohipa a te Diabolo.’—Ioane 1, 3:8.

Faufaaraa ia ite i te parau mau: Te haapeapea ra paha oe no te faaroo-noa-raa i te ohipa taviri, te haavîraa e te ohipa tia ore. Ia ite oe eaha te tumu, e taa ïa ia oe no te aha te mau tupuraa i ino roa ˈi e no te aha teie nei ao e ore ai e maitai mai i te taata. (Salamo 146:3) Aita ïa e faufaa ia horoa i to oe taime e puai no te taui i te mau mea. A tiaturi râ i te mau parau tohu a te Atua, e oraraa papu ïa to oe a muri aˈe.—Apokalupo 21:3, 4.

Ia faaû tatou i te tahi ohipa tia ore, e autâ paha tatou mai ia Habakuka, tavini a te Atua: “Ua pahae hia te ture, e aore te haavaraa i tae i te hopea.” (Habakuka 1:4, Te Bibilia Moˈa V.C.J.S., 1976) Aita te Atua i tamaˈi ia Habakuka. Ua haapapu atu râ e ua faataa oia i te hoê taime no te faaafaro i te mau mea e ua tauturu ia ˈna ia oaoa noa ˈtu te fifi. (Habakuka 2:2-4; 3:17, 18) No reira, a tiaturi i te parau tohu a te Atua e faaore i te mau ohipa tia ore, e hau ïa to oe feruriraa noa ˈtu te ino o teie nei ao.

[Nota i raro i te api]

[Parau iti faaôhia i te api 7]

O te Atua iho â anei te tumu o te mauiui e te ohipa tia ore?

[Faaiteraa i te fatu o te hohoˈa i te api 7]

© Sven Torfinn/Panos Pictures