4 Xoossay Bessennabaa Oottiyaagaa Hegee Tumee?

Geella neeni siyidobaa: “Xoossay ha alamiyaa haariiddi deˈees; yaatiyo gishshau, ubbabaykka haniyoy a sheniyaadaana. Asa asappe shaakki xeelliyoogee, pirdda pacaynne huqqunnay alamiyan kumido gishshau, hegan oyshettiyay Xoossaa gidana bessees.”

Geeshsha Maxaafay tamaarissiyoobaa: Alamiyan deˈiya pirdda pacau gaasoy Xoossaa gidenna. Geeshsha Maxaafay Yihoowabaa, “A oosuwan wotoi baa; a oge ubbaikka suure” yaagidi qonccissees.—Zaa. 32:4.

Loˈˈobaa oottiyoogee etau bessenna giidi qoppiyo asata gujjin, ubba asau Xoossay kehees. Leemisuwau, “iita asaukka lo77o asaukka Xoossai ba awaa awaxxissees; qassi xillotuyyookka nagaranchchatuyyookka ba iraa bukissees.” (Maa. 5:45) Ubba wogan deˈiyaanne ubba qommo asaa i bessiyaagaadan oyqqiyoogaa, Oosuwaa 10:34, 35y qonccissees: “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [galatees].”

Yaatin, pirdda pacau gaasoy aybee? Daro asay suure pirddaara gayttidaagan Xoossaa leemisuwaa kaallennan ixxidi, bessennabaa oottanau dooriis. (Zaa. 32:5) Xoossay ba morkkee, Dabloosi alamiyaa haaranaadan paqqadidoogaakka Geeshsha Maxaafay yootees. * (1 Yoh. 5:19) Gidikkokka, Xoossay suure gidenna ha haaruwau paqqadido wodee matan wurana. “Xalahe halaqaa oosuwaa xaissanau” Xoossaa Naˈay tangguwaa ekkiyoogaa doommiis.—1 Yoh. 3:8.

Tumaa eriyoogee nena maaddiyo ogiyaa: Iita oosuwaa, huqqunnaanne pirdda pacaa xeelliyaagan odettiya darobaa siyiyo wode, hanettiyaabaa akeekanau metootana danddayaasa. He metuwau gaasoy aybakko eriyoogee, hanotati hagaa keena iitido gaasuwaanne alamee giiga soho gidanaadan asay baaxetiyoobay ubbatoo hada gidiyoy aybissakko akeekanau nena maaddees. (Maz. 146:3) Guutta wode xallaassi hanotaa laammanau wolqqaanne wodiyaa wurssiyoogaappe, Xoossay gelido qaalan ammanettiyoogan sinttanaabaa hidootan naagana danddayaasa.—Ajj. 21:3, 4.

Issi wolqqaama metoy nu bolli gakkiyo wode, pirdda pacaa gaasoy aybakko akeekiyoogee keehi maaddana danddayees. Nu bolli pirdda pacay gakkiyo wode, nuunikka Xoossaa ashkkaraa, Imbbaaqoomaagaadan, “Higgee leppiis; tumi kiyi erenna” gaana danddayoos. (Imb. 1:4) Imbbaaqoomi hegaadan giido gishshau Xoossay a hanqqettibeenna. Xoossay ubba, hanotata giigissanau wodiyaa keeridoogaa yootiyoogan ba ashkkaraa minttettiis; qassi Imbbaaqoomi metoy gakkishinkka ufayttanaadan maaddiis. (Imb. 2:2-4; 3:17, 18) Hegaara issi mala hanotan, Xoossay pirdda pacaa giigissanau gelido qaalan ammanettiyoogee, pirdda pacay kumido ha alamiyan neenikka woppaanne sarotettaa demmanaadan maaddees.

[Tohossa qofaa]

[Sinttaa 7n deʼiya misiliyaa qonccissuwaa]

Pirdda pacaanne tuggaa gishshau, Xoossay oyshettana bessii?

[Sinttaa 7n deʼiya misiliyaa qonccissuwaa]

© Sven Torfinn/Panos Pictures