5 Lubanga Jolo Woro Ducu ma a ki i Cwinywa Tika Man Tye Lok Ada?

Gin ma gwok nyo iwinyo: “Kit macalo yo mapol mapat pat tero dano i kabedo acel-li, tye bene yo mapol ma tero dano bot Lubanga. Ngat acel acel myero oyeny yone me cito bot Lubanga.”

Gin ma Baibul pwonyo: Omyero wawor Lubanga ki cwinywa ducu, kun pe watimme ni wek dano onenwa nyo wabwolle kekenwa. Yecu otito bot lutela dini me karene ca gin mumiyo Lubanga okwerogi woko ni: “Icaya con oloko i komwu kakare, macalo en ocoyo ni Lubanga owacci, ‘Rok man kara giwora ki doggi nono, ento cwinygi pe i koma wacel.’” (Marako 7:6) Ento, woro Lubanga ki cwiny me ada pe te lokke ni en bijolo worowa.

Yecu onyuto man atir ka maleng i kare ma en otito goro ma tye i woro pa lutela dini magi kacel ki lulub korgi. Yecu otiyo ki Lok pa Lubanga i komgi ni: “Giwora nono, pwony ma gipwonyo obedo pwony ma mako kit pa dano.” (Marako 7:7) Worogi onongo tye “nono,” nyo konye pe, pien onongo giketo cik me tekwaro me dinigi bedo mukwongo ma ka lubo gin ma Lubanga mito.

Ma ka cwako tam ni tye yo mapol mapat pat me o bot Lubanga, Baibul pwonyo ni tye yo acel keken. Matayo 7:13, 14 waco ni: “Wudony ki i doggola mading, pien doggola ma tero dano i to lac, dok yone gipiro maber, dok jo ma donyo ki iye pol. Pien doggola ma tero dano i kwo ding, ki yone bene rac, dok jo ma nongo yo meno ginok.”

Kit ma ngeyo lok me ada konyi kwede: Go kong kit ma ibiwinyo kwede ka ipwonye pi dwe mapol me pyem i pyem ngwec, dok ingeye ibedo namba acel, ento kiwacci ni pe kibimini medila pienni ituro cik mo ma pe ingeyo. Ibiwinyo ni kero ducu ma iketo i pyem ngwec man oto nono. Tika gin ma cal ki man romo timme i worowa bot Lubanga?

I kare ma tye ka poro worowa ki pyem ngwec, lakwena Paulo ocoyo ni: “Lapyem i tuko pe twero loyo tuko ka pe olubo cik me tuko meno kikome.” (2 Temceo 2:5) Wanongo cwak pa Lubanga ka wawore kun ‘walubo cikke,’ ma tere ni wawore kit ma en mito kwede. Ngat ma tye i pyem ngwec pe loyo ka pe lubo cik. I yo acel-lu, wan bene pe wanongo cwak pa Lubanga ka watemme me yenyo yo ma wamito me tic pire.

Me yomo cwiny Lubanga, omyero pe wawek woro ma wamiyo bot Lubanga opong ki lok goba madok i kome. Yecu owacci: “Jo ma woro i ada gibiworo Won i cwiny ki ada.” (Jon 4:23) Wapwonyo yo me ada me o bot Lubanga ki i Lokke, Baibul.​—Jon 17:17. *

[Lok ma tye piny]

[Boro buk i pot karatac 8]

Tika dini ducu pwonyo dano me woro Lubanga i yo ma en cwako?